Prezident əməkdar memara yüksək vəzifə verdi

Prezident İlham Əliyevin Sərəncamı ilə Əməkdar memar Səbinə Hacıyeva Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə yeni rəis təyin olunub.

Məlumata görə, Səbinə Hacıyeva Azərbaycan Memarlıq və İnşaat Universitetinin professoru və memarlıq konstruksiyaları və abidələrin bərpası kafedrasının müdiri olub. Beynəlxalq Memarlıq Akademiyasının Moskva bölməsinin müxbir üzvüdür.

1994-cü ildə Azərbaycan İnşaat Mühəndisləri İnstitutunu (indiki Azərbaycan Memarlıq və İnşaat Universiteti) bitirib. JICA-Yaponiyanın Beynəlxalq Əməkdaşlıq Agentliyi tərəfindən Tokio şəhərində təşkil edilmiş “Yaşayış tikintisinin siyasəti” kursunda, Beynəlxalq Təhsil üzrə Amerika Şurası tərəfindən təşkil edilmiş RSEP proqramında iştirak edib və Mayami Universitetində stajartırma keçib.

Azərbaycan Memarlıq və İnşaat Universitetinin nəzdində fəaliyyət göstərən “Abidələrin bərpası və mühafizəsi” elmi-tədqiqat laboratoriyasında müxtəlif vəzifələrdə çalışıb. Azərbaycan Memarlar İttifaqının İdarə heyətinin üzvüdür. Azərbaycan Prezidentinin müvafiq Sərəncamları ilə “Tərəqqi” medalı və “Əməkdar memar” fəxri adı ilə təltif olunub.

Xatırladaq ki, Prezident İlham Əliyevin bu gün imzaladığı Sərəncamla Azad Cəfərli Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi postundan azad edilib. 45 yaşlı A.Cəfərli 2021-ci ilin fevralında sözügedən Xidmətin rəisi təyin edilmişdi.