Neft "Şanxay karantini" fonunda ucuzlaşır: bugünə olan qiymət
Neft qiymətləri, COVID-19 hallarının artmasına cavab olaraq Pekinin tətbiq etdiyi ciddi məhdudiyyətlər səbəbindən Çində tələbin azalması qorxusundan bir gün əvvəl kəskin enişdən sonra yenə enməyə davam edir.
Bloomberg qeyd edir ki, Çində koronavirusun yayılması pandemiyanın başlanğıcından bəri ən böyük epidemiyadır. Hazırda Çində 62 milyondan çox insan ya məhdudiyyətlər altındadır.
Şanxay hakimiyyəti bazar ertəsindən etibarən şəhərin maliyyə rayonu və sənaye parklarının yerləşdiyi şərq hissəsini vətəndaşların kütləvi sınaqdan keçirilməsi üçün dörd gün müddətinə bağlayıb. Gələcəkdə, həmçinin dörd gün ərzində şəhərin qərb hissəsi bağlanacaq.
Rystad Energy hesab edir ki, Şanxayda karantin neftə tələbatın sutkada 200 min barel azalmasına səbəb ola bilər.
Londonun ICE Futures birjasında bugün saat 9:15-ə Brent markalı neftin may fyuçerslərinin dəyəri bir barel üçün 110,71 dollar təşkil edir ki, bu da əvvəlki sessiyanın bağlanış qiymətindən 1,77 dollar (1,57%) aşağıdır.
Nyu-York əmtəə birjasının (NYMEX) elektron hərraclarında may ayı üçün WTI neftinin fyuçerslərinin qiyməti bu vaxta kimi bir barel üçün 104,77 dollar təşkil edir ki, bu da əvvəlki sessiyanın yekun dəyərindən 1,19 dollar (1,12%) aşağıdır.
COVID-19-a yoluxma hallarının artması Rusiya-Ukrayna münaqişəsi, eləcə də Yaxın Şərqdəki gərginlik kontekstində neft bazarında qeyri-sabitlik yaradır.
Bu arada, OPEC+ ölkələri may ayında neft hasilatı planlarını müzakirə etmək üçün cümə axşamı növbəti iclas keçirməyə hazırlaşır. Qrup nümayəndələrinin son bəyanatları OPEC+ ölkələrinin əvvəllər razılaşdırılmış qrafikə uyğun olaraq hasilatı artırmağa qərar verəcəyini deməyə əsas verir.
