Çin koronavirusa görə Şanxayı bağladı. Bu xəbər nefti ucuzlaşdırır - qiymət
Neft qiymətləri bazar ertəsi Çinin koronavirusun yayılmasının qarşısını almaq üçün ciddi məhdudlaşdırıcı tədbirlər tətbiq etməsi xəbəri ilə ucuzlaşıb. Bloomberg xəbər verir ki, Şanxay hakimiyyəti bazar ertəsindən etibarən şəhərin maliyyə rayonu və sənaye parklarının yerləşdiyi şərq hissəsini vətəndaşların kütləvi sınaqdan keçirilməsi üçün dörd gün müddətinə bağlayıb.
Gələcəkdə, həmçinin dörd gün ərzində şəhərin qərb hissəsi də bağlanacaq. Ekspertlər karantin məhdudiyyətlərinin Çində enerjiyə olan tələbatı zəiflədəcəyindən ehtiyat edirlər.
Londonun ICE Futures birjasında bazar ertəsi saat 9:15-ə Brent markalı neftin may fyuçerslərinin dəyəri bir barel üçün 117,4 dollar təşkil edir ki, bu da əvvəlki sessiyanın bağlanış qiymətindən 3,25 dollar (3,69%) aşağıdır.
Nyu-York əmtəə birjasının (NYMEX) elektron hərraclarında may ayı üçün WTI neftinin fyuçerslərinin qiyməti bu vaxta kimi bir barel üçün 110,54 dollar təşkil edir ki, bu da əvvəlki sessiyanın yekun dəyərindən 3,36 dollar (2,95%) aşağıdır.
Son bir həftə ərzində Brent 12%, WTI 10,5% bahalaşıb. Neft qiymətlərinin artmasına davam edən Rusiya-Ukrayna münaqişəsi ilə yanaşı, Yəmən husi üsyançılarının məsuliyyəti öz üzərinə götürdüyü Səudiyyə Ərəbistanında neft anbarına hücumla bağlı xəbərlər də kömək edib. Bloomberg xəbər verir ki, şənbə günü Husilərin lideri Mehdi əl-Məşat hücumları üç günlük dayandırdığını elan edib.
"Neft bazarının tələbin perspektivləri ilə bağlı narahatlıqları nəzərə almağa başlaması təbiidir", - deyə Sinqapurdakı Vanda Insights şirkətinin təsisçisi Vandana Hari bildirib: "Bazarın dinamikasını dəyişə biləcək əsas amil Rusiya ilə Ukrayna arasında diplomatik danışıqların statusudur".
