Lökbatanda yeni avtostansiya istifadəyə veriləcək - QADAĞA QOYULACAQ
Bakı Cənub Avtostansiyası fevral ayında istifadəyə veriləcək.
Bu barədə Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin (DANX) ictimaiyyətlə əlaqələr sektorunun müdiri Nuridə Allahyarova deyib.
O bildirib ki, cənub, cənub-şərq və cənub-qərb bölgəsində yaşayan vətəndaşların paytaxta rahat gediş-gəlişini təmin etmək məqsədilə Lökbatan ərazisində yeni avtostansiya inşa edilir. Artıq tikinti işlərinin bir qismi başa çatdırılıb. Fevral ayında isə Bakı Cənub Avtostansiyası tam hazır vəziyyətdə vətəndaşların istifadəsinə veriləcək.
N.Allahyarova qeyd edib ki, yeni avtostansiya fəaliyyətə başladıqdan sonra Lökbatan dairəsindəki nəqliyyat xaosu aradan qalxacaq. “Həmin ərazidə ticarət mərkəzləri çox sıx yerləşib. İstər cənub, cənub-şərq və cənub-qərb bölgəsindən gələn vətəndaşlar, istərsə də Bakıdan Lökbatan dairəsi istiqamətinə gedənlər nəqliyyat vasitələrini dairənin ətrafında saxlayır. Bu da avtonəqliyyat vasitələrinin keçidi üçün maneə yaradır və hərəkət üçün bir zolaq saxlanılır. DANX Dövlət Yol Polisi ilə birlikdə reyd keçirərək dairə ətrafında nəqliyyat vasitələrinin dayanmasının qarşısını alıb. Bu nəqliyyat vasitələri avtostansiyaya yönəldilib. Artıq avtonəqliyyat vasitələri dairədən sırf hərəkət üçün istifadə edir”, deyə N.Allahyarova bildirib.
Onun sözlərinə görə, avtostansiyanın ən böyük üstünlüyü ondan ibarətdir ki, hazırda ticarət mərkəzlərindən alış-veriş edib cənub, cənub-şərq istiqamətinə gedən sərnişinlər əvvəlcə 20 Yanvar dairəsinə, oradan Bakı Beynəlxalq Avtovağzal Kompleksinə (BBAK), daha sonra isə rayona getməlidir. Avtostansiya istifadəyə verildikdən sonra isə artıq alış-veriş edib rayona getmək istəyən vətəndaşlar, birbaşa Bakı Cənub Avtostansiyasından rayona gedə biləcəklər.
“Avtostansiya qeyri-qanuni daşımaların da qarşısını alacaq. Çox zaman sərnişinlər Lökbatandan Avtovağzala getmək əvəzinə qanunsuz sərnişindaşıma fəaliyyəti göstərən nəqliyyat vasitələrindən istifadə edir. Avtostansiya istifadəyə verildikdən sonra qanunsuz fəaliyyət göstərən nəqliyyat vasitələrinin ərazidə sərnişindaşımalarına qadağa qoyulacaq. Bu da həm avtomobillərin sıxlığını aradan qaldıracaq, insanların rahat gediş-gəlişini təmin edəcək, qanunsuz daşımaların qarşısını alacaq, həm də BBAK-ın üzərinə düşən yükü azaldacaq”, - deyə N.Allahyarova vurğulayıb.
