İnterpol rəhbəri: 2021-ci ilin maye qızılı vaksindir, cinayətlər artacaq
İnterpolun baş katibi Yürgen Ştok koronavirusa qarşı peyvənd tədarükü zamanı cinayət fəaliyyətinin artacağını proqnozlaşdırıb.
“RİA Novosti” yazır ki, o, bu barədə “Wirtschaftswoche” nəşrinə açıqlamasında bildirib.
“Peyvənd 2021-ci ilin maye qızıldır. Gələn il paylanacaq ən qiymətli şeydir. Mafiya və digər cinayətkar təşkilatlar artıq buna hazırlaşıblar. Vaksinasiyanın başlanması ilə cinayətlər xeyli artacaq. Oğurluqlar, saxlanc yerlərinin qarət edilməsi, peyvənd dozaları daşıyan nəqliyyat vasitələrinə hücumların şahidi olacağıq, qiymətli materiallara daha tez çatmaq üçün bir çox yerdə iri korrupsiyalaşma olacaq. Qeyd edim ki, hələ vaksinlər qeydə alınmadan cinayətkarlar saxta peyvəndlər yayırdılar”, - o deyib.
Ştokun sözlərinə görə, koronavirus pandemiyası ümumilikdə cinayətkarlara yeni imkanlar yaradıb və “cinayət pandemiyası” ilə nəticələnib.
"Uzun polis karyeramda belə fenomen görməmişəm: virus Asiyadan bütün qitələrə yayılır və bunun ardınca kriminal dalğası, belə dəsək, paralel cinayət pandemiyası başlayır. Cinayətkar qruplar ilk dəqiqələrdən COVID-19 sayəsində necə varlana biləcəkləri barədə düşünməyə başladılar. Məsələn, saxta dərmanlardan əvvəl onlar saxta dezinfeksiyaedicilərə, guya antiviral olan dərmanlara və aşağı dərəcəli qoruyuculuq qabiliyyəti olan maskalara keçdilər. Martda istehsalat piratlığına qarşı 90 ölkənin fəaliyyətini koordinasiya etməyə başladıqdan sonra bu günə qədər 15 milyon ABŞ dollar dəyərində saxta qoruyucu tibbi materiallar müəyyən etmişik”, - o söyləyib.
