Axtar

Məmməd Musayev Sənayeçilər və Sahibkarların Beynəlxalq Konqresinin XIII Assambleyasında iştirak edib

15 sentyabr 2020-ci il tarixində Sənayeçilər və Sahibkarların Beynəlxalq Konqresinin (SSBK) XIII Assambleyasının video-konfrans formatında iclası keçirilmişdir. İclasda Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti cənab Məmməd Musayevin rəhbərliyi ilə Konfederasiyanın nümayəndə heyəti də iştirak etmişdir. Tədbirdə SSBK-nın Şura Sədri Vasili Pavloviç Tarlev cənab Məmməd Musayevin Şura Sədrinin müavini kimi Konqresin bütün tədbirlərində fəal iştirak etdiyini , sahibkarlığın inkişafına böyük töhfə verdiyini xüsusi vurğulamışdır.

Konqresin XIII Assambleyasında SSBK-nın üzvlüyünə qəbul, SSBK Şurasının və Təftiş Komissiyasının üzvlərinin seçilməsi, SSBK Prezidentinin növbəti dövr üçün təsdiqlənməsi və onun Konqresin gələcək fəaliyyətinin prioritet istiqamətləri, onun həyata keçirilmə prinsipləri və formaları haqqında məlumatı kimi məsələlərə baxılmışdır.

İclasda ASK prezidenti cənab Məmməd Musayev yenidən növbəti müddətə  Sənayeçilər və Sahibkarların Beynəlxalq Konqresi Şurasının sədr müavini, həmyerlimiz , SSBK-nın Türkiyə Respublikası, Orta Şərq və Afrika ölkələrinin işgüzar dairələri ilə qarşılıqlı əlaqələr üzrə Koordinasiya Şurası sədrinin müavini Elçin Seyidov Şuranın üzvü, ASK prezidentinin baş məsləhətçisi Məhəmmədəli Əfəndiyev isə təkrarən Şuranın Təftiş Komissiyasının üzvü seçilmişlər.

Tədbirdə SSBK Prezidentinin məlumatı ətrafında Milli sahibkarlar təşkilatlarının bir qrup  rəhbərləri ilə yanaşı ayrı-ayrı nüfuzlu təşkilat rəhbərləri , o cümlədən Avroasiya iqtisadi komissiyasının inteqrasiya və makroiqtisadiyyatın əsas istiqamətləri üzrə Kollegiya üzvü-Nazir,akademik Qlazev Sergey Yuryeviç , Moskva Ticarət-Sənaye Palatasının Prezidenti Platonov Vladimir Mixayloviç , Rusiya Biznes və Sahibkarlıq Akademiyasının Prezidenti Qorbulina İrina Vyaçeslavovna , Elmi İstehsalat “İqtisadi strategiya institutu”-nun Baş direktoru Aqeev Aleksandr İvanoviç və digərləri çıxış etmişlər.

Çıxışlarda əsasən ayrı-ayrı ölkələrdə pandemiya şəraitində və pandemiyadan sonrakı dövrdə sahibkarlığın inkişafı, dövlət-biznes əlaqələri ,qarşılıqlı tərəfdaşlıq məsələləri öz əksini tapmışdır. Daha çox yaranmış vəziyyətdən çıxış yolları müzakirə olunmuşdur.

 SSBK-nın 2021-ci ildə keçiriləcək növbəti Assambleyası zamanı müzakirəyə çıxarılması şərtilə, Şuraya üzv qurumların və ekspert qruplarının  iştirakı ilə Konqresin İnkişaf Strategiyasının işlənib hazırlanması, Konqresin mövcud olan bütün imkanları ilə üzvlərin uğurlu və səmərəli işinin təmin edilməsi, eləcə də aidiyyəti fəaliyyətin həyata keçirilməsi üçün hüquq, maliyyə, bank və əməkdaşlıq sahələri də daxil olmaqla müasir dəstək formalarının praktikada tətbiqinin təşviq edilməsi, həmçinin SSBK-nın gələcəkdə fəaliyyət prioritetlərinin uğurlu formada həyata keçirilməsi məqsədilə müvafiq qərarlar qəbul edilmişdir.

Daha sonra, aidiyyəti məsələlərin müzakirəsi ilə Assambleya öz işini yekunlaşdırmışdır.

Xatırladaq ki, Sənayeçilər və Sahibkarların Beynəlxalq Konqresi  Avropa və Asiyanın işgüzar dairələri təşkilatlarının könüllü ictimai birliyi olmaqla 1992-ci ilin fevral ayında yaradılmışdır. Hazırda MDB, Mərkəzi Avropa, Asiya, Afrikanın 28 ölkəsindən sənayeçilər və sahibkarların 30 milli ittifaqı Konqresin tərkibindədir.

 Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) 1999-cu ildə təsis olunaraq fəaliyyət göstərir və  Konfederasiya həmin vaxtdan etibarən Sənayeçilər və Sahibkarların Beynəlxalq Konqresinin fəal üzvlərindəndir.

Konqresin bir sıra Şura və Rəyasət heyətinin iclasları, beynəlxalq konfransları Azərbaycan Respublikasının Sahibkarlar (İşəgötürənlər) Təşkilatları Milli Konfederasiyasının ev sahibliyi ilə  Bakı şəhərində keçirilmişdir. Konqresin rəhbərləri və mütəxəssisləri Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının bütün tədbirlərində təmsil olunmuşlar.

2011-ci ildən etibarən Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti cənab Məmməd Musayev fasiləsiz olaraq Sənayeçilər və Sahibkarların Beynəlxalq Konqresi Şurasının sədr müavini seçilmişdir.

Əlaqə

Email : enanewsaz@gmail.com

Tel : +994 70 500 12 33