ÜST: "Koronavirusda ən pisi hələ gəlməyib"
Ümumdünya Səhiyyə Təşkilatının (ÜST) sədri Tedros Adhanom Ghebreyesus, ölkələrdə milli birliyin təmin edilə bilinməməsi, qlobal həmrəylikdə əskiklik və dünyadakı bölünmələrin yeni növ koronavirusun (Kovid-19) yayılmasına kömək etdiyini bildirib.
ENA.az xəbər verir ki, o, "Pandemiyada ən pisi hələ gəlmədi. Bunu söylədiyim üçün təəssüf edirəm. Amma bu cür mühit və şərtlərdə ən pisinin gəlməsindən narahatıq" xəbərdarlığını edib.
ÜST-in İsveçrənin Cenevrə şəhərində olan mərkəzində video konfrans yolu ilə təşkil edilən mətbuat konfransında danışan Ghebreyesus, dünyada Kovid-19-a yoluxduğu aşkar edilənlərin sayının 10 milyonu, virusdan ölənlərin sayının da yarım milyonu aşdığını xatırladıb.
"Virus sona çatmağa yaxın belə deyil"
Bir çox ölkənin, virusun yayılmasının qarşısını almaq üçün bənzəri görülməmiş tədbirlər gördüyünü vurğulayan Ghebreyesus belə danışıb:
"Bu tədbirlər virusun yayılmasını yavaşlatmaqda müvəffəqiyyətli oldu. Lakin tamamilə dayandırmadı. Bəzi ölkələr iqtisadiyyatlarını və cəmiyyətlərini yenidən açmağa başladıqları üçün yoluxmaların yenidən ortaya çıxması ilə qarşı-qarşıya qalır. Bir çox insan virusa ciddi baxmır. Virusun hələ yayılacağı çox sahə var. Hamımız bunun bitməsini istəyirik. Hamımız həyatımıza qaldığı yerdən davam etmək istəyirik. Amma gerçək budur ki, bu epidemiya sona çatmağa yaxın belə deyil".
"Bir çox ölkə bəzi irəliləyişlər qeyd etmiş olsa da qlobal olaraq pandemiya əslində sürətlənir" deyən Ghebreyesus, dünyanın epidemiya ilə birlikdə çox şey itirdiyini amma ümidin itirilməməsi lazım olduğunu vurğulayıb.
