“Hökumət çörəyin, ətin və şəkərin qiymətini dondurmalıdır” – DEPUTAT

Karantin şəraitində və neftin belə ucuzlaşdığı bir dövrdə ərzaq məhsullarının qiymətlərinin sabitliyini bir ay təmin etmək olar.

Bunu millət vəkili Vahid Əhmədov açıqlamasında deyib.

Onun sözlərinə görə, ölkədə kifayət qədər ərzaq ehtiyatı mövcuddur və xaricdən idxal davam edir. Lakin koronavirusun baş verməsi və neft qiymətlərinin düşməsi istehlak qiymətlərinə təsir etməyə bilməz: “Hökumət məhsulların fasiləsiz təchizatını və əsas malların qiymət sabitliyini təmin etmək üçün lazımi tədbirlər görür. Ancaq mövcud şəraitdə bu, uzun müddət davam edə bilməz və müəyyən bir müddətdən sonra qiymətlər sıçraya bilər. Görünən odur ki, əsas ərzaq məhsulları – çörək, ət, şəkər və bir sıra digər məhsulların qiymətlərinin dondurulduğu Rusiya təcrübəsindən istifadə etməliyik”.

Hazırda rayonlardan Bakıya giriş praktiki olaraq bağlanıb və fermerlər praktiki olaraq tərəvəz və meyvələri paytaxta gətirmək iqtidarında deyillər, bu, əlbəttə ki, onların çatışmazlığına və müvafiq olaraq qiymət artımına səbəb olacaq: “Düşünürəm ki, yaxın gələcəkdə bu problemi həll etmək lazımdır. Məsələn, kənd təsərrüfatı məhsullarının virus və dezinfeksiya üçün sınaqdan keçiriləcəyi sanitariya-epidemioloji kordonların yaradılması mümkündür. Ancaq məhsul sonra yenə də şəhərə çatdırılmalıdır. Yerli məhsulların paytaxtdakı bazarlara və dükanlara çatdırılması üçün bəzi başqa variantlar da mümkündür. İstənilən halda, fermerlərə Bakını məhsulla təmin etməyə və pul qazanmağa imkan vermək lazımdır”.

Qeyd edək ki, Azərbaycanda tətbiq olunan xüsusi karantin rejimi ilə əlaqədar ölkənin bölgələri arasında hərəkət qadağandır. Bu addım koronavirusun yayılmasının qarşısını almaq üçün atılıb. Dünən gecədən maşınların bir rayondan digərinə keçməsi dayandırılıb.

Onu da xatırladaq ki, Azərbaycanda xüsusi karantin rejimi martın 24-də elan edilib və aprelin 20-si saat 00: 00-dək davam edəcək.

VirtualAz