Azərbaycan İranla sərhəddi ciddi nəzarətə götürdü: Növbəli təcili tibbi yardım briqadalar ayrılıb
Azərbaycan Dövlət Gömrük Komitəsi (DGK) İranla sərhəddəki gömrük keçid məntəqələrində nəzarəti gücləndirib.
Komitə İranla keçid məntəqələrinin "bağlanmadığını, ancaq xüsusi nəzarətə sahib olduqlarını" bildirib.
ENA.az xəbər verir ki, “İran tərəfdən sərhədi keçən şəxslər ofis binasına girmədən xüsusi yoxlama prosedurundan keçirlər. Onların temperaturu portativ termometrlərlə ölçülür. Eyni zamanda, postlara gecə-gündüz növbə çəkən təcili tibbi yardım briqadaları cəlb olunub ”, - deyə Dövlət Gömrük Komitəsindən verilən məlumatda qeyd olunur.
Daha əvvəl bildirilirdi ki, Türkiyə hakimiyyəti oradakı koronavirusun yayılması ilə əlaqədar İranla sərhədi müvəqqəti bağlamaq qərarına gəlib. Gürcüstanın İranla hava nəqliyyatına məhdudiyyətlər qoyduğu və İrandan Gürcüstana və əksinə şəxslərin hərəkətini məhdudlaşdırdığı da söylənilir.
Qeyd edək ki, İranda virus qurbanlarının sayı səkkiz nəfərə çatıb. Bundan əlavə, daha 43 nəfərdə bu koronavirus aşkarlanıb - onlar müalicə altındadır.
Beləliklə, hazırda İran bu virusun aşkar olunduğu 19 ölkə arasında ölənlərin sayına görə dünyada ikinci, xəstəliyin episentri - Çindən sonra ikinci yeri tutur.
