Axtar

"3 növbəli iş rejiminə keçib, Azərbaycanı idxaldan azad edəcəyik"

Hazırda "Diamed Co" şirkətinin şpris istehsalı zavodunda ildə 50 milyon ədəd şpris istehsal edilir. Bunu şirkətin təsisçisi Aytən Quliyeva deyib.

“İndi zavodda 50 nəfər çalışır. Yaxın vaxtlarda biz 3 növbəli iş rejiminə keçəcək və ildə 150 milyon ədədə qədər müxtəlif həcmli şpris istehsal edə biləcəyik”, - deyə o, bildirib.

Eləcə də bax: "Azərbaycanda insanlar mənşəyi məlum olmayan şprislər alır"

A.Quliyevanın sözlərinə görə, ildə 150 milyon ədəd şpris istehsalı Azərbaycana bu məhsulun idxalından tamamilə imtina etməyə imkan verəcək.

“Yaxın iki-üç il ərzində qonşu dövlətlərin bazarlarına çıxmağı planlaşdırırıq. O zaman şpris istehsalı tələbatdan asılı olaraq ildə 200-250 milyon ədədə çata bilər”, - deyə “Diamed Co” şirkətinin təsisçisi qeyd edib.

Onun sözlərinə görə, şpris istehsalı üçün lazım olan iynələr Yaponiyadan, xammal isə İsveçrədən gətirilir.

“Zavodumuzun məhsulları bütün beynəlxalq tələblərə cavab verir və keyfiyyət baxımından Avropa analoqlarından heç də geri qalmır. Məhsullarımızın qiymətlərinə gəldikdə, onlar Avropa analoqlarından ucuz, naməlum mənşəli şprislərlə müqayisədə isə təbii ki, bahadır”, - deyəA.Quliyeva əlavə edib.

O vurğulayıb ki, hazırda yerli bazarda şprislərin satışı ilə bağlı bəzi problemlər mövcuddur. “Belə ki, Azərbaycana gətirilən naməlum mənşəli şprislər çox ucuz və keyfiyyətsizdir. Qanunvericilikdə boşluq var və onu aradan qaldırmaq lazımdır. İdxal olunan şprislər qeydiyyata alınmalıdır. Lakin qanunvericilikdə olan boşluq idxalçılara bu prosedurdan yayınmağa imkan verir”, - deyə A.Quliyeva bildirib.

Əlaqə

Email : enanewsaz@gmail.com

Tel : +994 70 500 12 33