İcbari Tibbi Sığortanın tətbiqi 2021-ə qalır?

Hazırda Mingəçevir, Ağdaş, Yevlax və Naxçıvan Muxtar Respublikasının Sədərək rayonunda pilot layihə olaraq həyata keçirilən icbari tibbi sığortanın 2020-ci ildən bütün ölkə üzrə tətbiq olunacağı açıqlanıb.

Qeyd edək ki, icbari tibbi sığorta əhalinin sosial müdafiəsi formasıdır və sığorta hadisəsi zamanı əhaliyə icbari tibbi sığortanın maliyyə mənbələri hesabına ilkin səhiyyə xidmətlərinin, təcili və təxirəsalınmaz tibbi yardımın göstərilməsinə təminat verən dövlətin hüquqi, iqtisadi və təşkilati tədbirlər sistemidir. İcbari tibbi sığorta eyni zamanda sığorta olunanlara baza zərfində nəzərdə tutulmuş şərtlər çərçivəsində tibbi xidmətlərin göstərilməsinə təminat verir.

ENA.az xəbər verir ki, Modern.az-a a daxil olan məlumata görə, vətəndaşların böyük səbirsizliklə gözlədiyi layihənin gerçəkləşməsi daha bir il yubadılacaq. Qeyd olunur ki, icbari tibbi sığortanın ölkə üzrə 2021-ci ildən tətbiqilə bağlı qanunvericiliyə dəyişiklik edilməsi gözlənilir.

İcbari Tibbi Sığorta üzrə Dövlət Agentliyinin (İTSDA) Marketinq və ictimaiyyətlə əlaqələr departamentindən Modern.az-ın sorğusuna cavab olaraq bildirilib ki, Prezident İlham Əliyevin “Azərbaycanda icbari tibbi sığortanın tətbiqinin təmin edilməsi ilə bağlı bir sıra tədbirlər haqqında” 20 dekabr 2018-ci il tarixli 418 №-li Fərmanına əsasən 1 yanvar 2020-ci ildən ölkə üzrə icbari tibbi sığortanın tətbiqinə başlanılacaq:

“Bu məqsədlə 28 dekabr 2018-ci il tarixində icbari tibbi sığortanın ölkə üzrə tətbiqinə şərait yaradan “Tibbi sığorta haqqında” Azərbaycan Respublikasının Qanununda dəyişiklik edilməsi barədə Qanun qəbul edilib”.

Agentlikdən verilən məlumatda həmçinin qeyd olunub ki, qanunvericiliyə dəyişiklik olunduğu təqdirdə ictimaiyyətə məlumat veriləcək.