Gələn ildən başlayaraq turistləri ildə iki dəfə kosmosa yollayacaqlar
Amerikanın idarəetmə gəmiləri tərəfindən turistlərlə birgə 2020-2021-ci illərdə Beynəlxalq Kosmik Stansiyasına (BKS) üç uçuşun həyata keçiriləcəyi nəzərdə tutulur.
ENA.az bu barədə RİA Novostiyə istinadla xəbər verir.
ABŞ-da yeni idarəetmə gəmiləri - “SpaceX” şirkəti tərəfindən “Crew Dragon”, “Boeing” tərəfindən isə “Starliner” işlənib hazırlanıb. İyunun əvvəlində NASA turistlərin 2020-ci ildən başlayaraq ildə iki dəfə Amerika gəmilərində BKS-yə yollana biləcəkləri barədə xəbər vermişdi. NASA-nın maliyyə direktoru Ceff Devit qeyd edib ki, BKS-də bir aylıq uçuş turistə 59 milyon dollardan artıq başa gələcək.
Bildirilir ki, Amerika gəmilərinin turistlərlə BKS-yə təqribən bir ay davam edəcək uçuşları 2020-ci ilin oktyabrına, 2021-ci ilin martına və avqustuna planlaşdırılıb. Hər gəmi stansiyaya üçədək turist daşıya biləcək.
İndiyədək turistlər BKS-yə yalnız Rusiyanın “Soyuz” gəmilərində uça bilirdilər. “Space Adventures” şirkəti ilə bağlanılan saziş üzrə 2001-2009-cu illərdə “Soyuz” gəmilərində stansiyaya yeddi turist, o cümlədən amerikalı Çarlz Simoni çatdırılıb. “Soyuz” gəmilərində BKS-yə 10 sutkalıq uçuş üçün turistlərdən müxtəlif illərdə 25-50 milyon dollar həcmində vəsait tələb olunub.
