Sosial iqtisadiyyat

"“Uşaq pulu” əhalisi azalan ölkələrdə daha aktualdır, bizdə isə bu hal yoxdur" - VİDEO

2006-cı il 1 iyun tarixindən etibarən Azərbaycanda uşaqlar üçün müavinət verilmir.

ENA.az Xəzər TV-yə istinadən xəbər verir ki, həmin dövrdə müavinətin ləğvi ünvanlı sosial yardımın tətbiqi, uşaqlar üçün verilən pulun məbləğinin çox aşağı olması ilə əsaslandırılmışdı.

Lakin son vaxtlar uşaqlar üçün verilən müavinətin bərpası məsələsi mütəmadi olaraq gündəmə gətirilir. Mövzunu siyasiləşdirib iqtidara qarşı istifadə etmə cəhdləri intensivləşib.

Uşaq pulunun bərpa edilməsi ilə bağlı son dövrlər müzakirələr aparılır. Bu vəsaitin yenidən vətəndaşlara verilməsi üçün fərqli təkliflər irəli sürülür.

İlk növbədə onu qeyd etmək lazımdır ki, uşaq pulları inkişaf etmiş ölkələrdə verilir və əhalinin azalmasının qarşını almaq üçün görülən stimullaşdırıcı tədbir xarakteri daşıyır. Azərbaycanda isə əhalinin azalması kimi hal yoxdur.

Millət vəkili Aydın Hüseynov deyir ki, uşaq pulunun bərpa edilməsi üçün lazım olan digər tələblər də Azərbaycanda aktual deyil.

Millət vəkili qeyd edir ki, uşaq pulu adlanan vəsait Sosialist düşərgəsinə daxil olan keçmiş ölkələrin bəzisində isə hələ də aztəminatlı, çoxuşaqlı ailələrə sosial yardım məqsədilə verilir.

Azərbaycanda aztəminatlı ailələrin rifah halının yaxşılaşdırılması məqsədilə ciddi tədbirlər həyata keçirilir.

Ölkədə nəinki aztəminatlı ailələr, digər təbəqədən olan insanların da inkişafı naminə ciddi layihə və proqramlar var.

Aydın Hüseynovun sözlərinə görə, bu tipli təkliflərin irəli sürülməsi ölkənin uğurlarını həzm edə bilməyən qüvvələrin növbəti uğursuz addımıdır.

Aydın Hüseynov vurğulayıb ki,uşaq pulu mövzusu ətrafında müzakirələr manipulyativdir. Azərbaycan hökuməti həyata keçirdiyi siyasətlə ali məqsədinin nə olduğunu hər dəfə sübut edir.

Ən vacib xəbərləri Telegram kanalımızdan OXUYUN! (https://t.me/enaxeber)