Əsas məzmuna keç
Bakı +14°, buludlu
--:--:--
Tez-tez axtarılanlarBölmələr
Bank

Bank sektorunda 10 AY necə keçdi? 2 bankın bağlanması hansı rəqəmlərə təsir edib?

Bank sektorunda 10 AY necə keçdi? 2 bankın bağlanması hansı rəqəmlərə təsir edib?

İlin sonuna 2 ay qalmış Azərbaycanda bank sektorunun vəziyyyəti necədir? Azərbaycan Mərkəzi Bankı 31 oktyabr 2023-cü il tarixinə olan ilkin rəqəmləri açıqlayıb. 

ENA.az xəbər verir ki, Azərbaycanın bank sisteminin ümumi aktivləri 46 milyard 146,6 milyon manat məbləğində qiymətləndirilir. 10 ay əvvəl, yəni 31 dekabr 2022-ci il tarixinə bankların aktivləri 47 milyard 54,9 milyon manat olub. Yəni, yanvar-oktyabr aylarında bankların aktivləri 2% azalıb. Bu da Azərbaycan Beynəlxalq Bankının öhdəliklərində baş vermiş azalmanın təzahürüdür və ilin sonuna qədər SOCAR-ın bu bankdakı hüquqi şəxs depozitindən çəkdiyi 2 milyard manatın təsiri rəqəmlərdə özünü göstərəcək. 

Amma aylar üzrə tendensiyaya baxsaq, 2023-cü ilin oktyabr ayında bankların ümumi aktivləri 616,6 milyon manat artıb.

10 ay ərzində bankların Mərkəzi Bankdakı müxbir hesablarında olan vəsaitlərin həcmi 42,2% - 3 milyard 659,8 milyon manata qədər azalıb.

Oktyabrın sonuna bankların kredit portfeli 22 milyard 459,7 milyon manat olub, yəni ötən 10 ayda 14,6% artıb.

Bankların ümumi kapitallaşması 5,2% artaraq 5 milyard 913,6 milyon manata yüksəlib. 

Bankların öhdəlikləri 2,9% azalma ilə 40 milyard 233 milyon manatdır. Bunun 92 milyon manatı Bankların Mərkəzi Bank qarşısında öhdəlikləridir və yerigəlmişkən, bu məbləğdə 2,2 dəfə azalma var.

Banklardakı depozit portfeli 2% azalma ilə 33 milyard 81,9 milyon manatdır. Əhalinin əmanətləri 6,9% artım göstərib və 12 milyard 271,1 milyon manata çatıb. 

Tənzimləyicinin məlumatına görə, 2023-cü ilin yanvar-oktyabr aylarında bankların ümumi xalis mənfəəti 908,2 milyon manatdır. Beləliklə, 2022-ci ilin 10 ayı ilə müqayisədə 18% artım var.

Hesabat dövründə bankların faiz gəlirləri 2 milyard 861,9 milyon manat (artım 29,4%), o cümlədən verilmiş kreditlər üzrə 2 milyard 101,8 milyon manat (artım 17%) təşkil edib.

Bankların qeyri-faiz gəlirləri 1 milyard 86,8 milyon manat məbləğində (artım 11,9%) olub.

Bu dövrdə bankların faiz xərcləri 677,9 milyon manat (artım 28,2%), o cümlədən depozitlər üzrə 479,9 milyon manat (artım 30,5%), qeyri-faiz xərcləri 1 milyard 859 milyon manat (artım 24,3%) təşkil edib.

Yanvar-oktyabr aylarının yekunları üzrə bank sektorunun əməliyyat mənfəəti 1 milyard 369,5 milyon manat (artım 22,6%) təşkil edib.

Hesabat dövründə bankların vergi ödənilənədək ümumi mənfəəti 1 milyard 146 milyon manat (artım 20,9%), mənfəət vergisi üzrə ödənişlər 237,8 milyon manatdır (artım 33,6%).

Qeyd edək ki, 31 oktyabr 2023-cü il tarixinə ölkəmizdə 23 bank fəaliyyət göstərir. Bu bankların 9-u xarici kapitallıdır. 2 bank bağlanıb. 

Bankların 471 filialı (2022-ci ilin sonuna olan göstərici ilə müqayisədə azalma 3,3%) və 86 şöbəsi (2022-ci ilin sonuna 91) var. Bu göstəricilərin azalması Günaybank və “Muğanbank” ASC-lərin fəaliyyət lisenziyasının ləğv edilməsi ilə bağlıdır. 

Bank sektorunda işçi sayı 2,3% artıb və 23 292 nəfərdir. Oktyabr ayında bank sektorunda çalışanlarının sayı “Muğanbank”ın bağlanması ilə əlaqədar, sentyabr ayı ilə müqayisədə 238 nəfər azalıb.

ENA.az TelegramdaHər gün yeniliklərdən xəbərdar olmaq üçün bizi sosial şəbəkələrdə izləyin!Bizi izlə