PAŞA Bank sahibkarların işini asanlaşdıracaq yeni məhsulları təklif edir
PAŞA Bank milli iqtisadiyyatın qeyri-neft sektoru üzrə Strateji Yol Xəritəsində nəzərdə tutulan tədbirlərə də töhfə verərək sahibkarlara və şirkətlərə çeşidli və əlverişli şərtlərlə maliyyə alətləri təqdim edir.
Sahibkarlara güzəştli şərtlərlə kredit
Bankın Kommersiya bankçılığı departamentinin direktoru Heydər Süleymanov qeyd etdiyi kimi, ənənəvi bankçılıqdan uzaqlaşan PAŞA Bank kənd təsərrüfatı, xüsusilə qoz-fındıq, bağçılıq, heyvandarlıq və s. sahələrdə püxtələşmiş müştəri menecerləri, mütəxəssislər və analitiklərin iştirakı ilə sahibkarlara yeni yanaşma tətbiq edərək xidmət göstərir. Belə ki, bu sahədə fəaliyyət göstərən hüquqi şəxslərə bank xidmətlərindən əlavə, istehsal olunan məhsulların müxtəlif üsullarla həm yerli, həm də xarici bazarlara çıxarılmasına köməklik göstərilir.
Bundan əlavə, PAŞA Bank Sahibkarlığın İnkişafı Fondu, Aqrar Kredit və İnkişaf Agentliyi və Dünya Bankı vasitəsilə sahibkarlara güzəştli şərtlərlə kredit təklif edir. Kredit üzrə ödəniş cədvəli mövsümi əsaslar nəzərə alınaraq təyin olunur ki, bu da müştərilərin maliyyə çətinliyi ilə üzləşməsinin qarşısını alır.
“Sahibkarların bank xidmətlərinə əlçatanlığını təmin etmək məqsədilə PAŞA Bankın biznes mərkəzləri həm paytaxtda, həm də regionlarda da – Gəncə və Zaqatalada - fəaliyyət göstərir”, - Heydər Süleymanov deyib.
Vergi və rüsumların daha rahat və sürətlə həyata keçirilməsi
PAŞA Bankın infrastrukturu ölkədə nağdsız ödənişə keçidə bir neçə il öncədən hazırdır. H. Süleymanovun sözlərinə görə, bu gün təchizatçılarla Kiçik və orta sahibkarlıq subyektləri arasındakı ticarət əsasən nağd qaydada həyata keçirildiyindən həmin şirkətlər müəyyən çətinliklərlə qarşılaşa bilirlər. “Biz bunun üçün bir çıxış yolu fikirləşmişik. Mal satan şirkət PAŞA Bank-dan POS-terminal, mağaza isə Tacir kartı əldə edir. Mal rəsmi verilir, mağaza sahibi də Tacir kart-dan istifadə edərək POS-terminal ilə malın pulunu ödəyir. Ödəniş zamanı ƏDV də avtomatik ödənilir,” – deyə H. Süleymanov qeyd edib.
Departament direktoru nağdsız ödənişlərin stimullaşdırılması ilə yanaşı, sahibkaralara dəstək məqsədilə görülən işlərdən də danışıb: “Biznes fəaliyyəti ilə məşğul olan hüquqi şəxslər və fiziki sahibkarlar üçün təklif etdiyimiz Gömrük kartı ilə gömrük məntəqələrində vergi və rüsumların daha rahat və sürətlə həyata keçirilməsi mümkündür. Kartdakı vəsait nağdlaşdırıla və ya alış-verişdə istifadə oluna bilməz. Bu kart yalnız gömrük məntəqələrində qurulan POS-terminallarda keçir. Bununla da biz idxal-ixracla məşğul olan sahibkarlara bizneslərini rahat həyata keçirmək üçün imkan yaradırıq”.
H. Süleymanov kartın digər üstünlüklərini də vurğulayaraq bildirib ki, sahibkarlar həm həftə içi, həm də həftə sonları İnternet bankçılıqdan istifadə edərək kartın balansını artıra bilərlər: “Qeyri-iş günləri gömrük rüsumlarının bank köçürməsi vasitəsilə ödənilməsi mümkün olmur. Bunun üçün Gömrük kartı sahibkarlar üçün əvəzsiz məhsuldur. Bundan başqa, kartda kifayət qədər böyük overdraft limitidə olur, vəsait çatmadığı təqdirdə overdraft limitindən də istifadə etmək mümkündür. İnternet bankçılıq da, öz növbəsində, müştərilərimizə bank əməliyyatlarının 95%-ni rahat və sürətli həyata keçirməyə imkan verir. Bundan əlavə, PAŞA Bankda regionda ilk dəfə olaraq fərdi sahibkarlar və hüquqi şəxsləri üçün onlayn şəkildə hesabın açılmasına başlanılıb və gələcəkdə bu kimi ilkləri davam etdirəcəyik”.
