Dünyanın ən böyük neft şirkəti böyük neft-kimya şirkətini alır - 69 MİLYARD DOLLAR ÖDƏYƏCƏK
"Saudi Aramco" 69 milyard dollar qarşılığında SABIC-in 70 faiz səhmini alır. Satınalma, 2 trilyon dollara yaxınlaşması gözlənilən "Saudi Aramco"nun səhmlərinin ilkin kütləvi təklifi (İPO) üçün də əhəmiyyət daşıyır.
Dünyanın ən böyük neft şirkəti olan Səudiyyə Ərəbistanının dövlət şirkəti "Saudi Aramco", bölgənin ən böyük neft-kimya şirkəti olan SABIC-in əksəriyyət hissəsini almaq üçün razılaşıb.
"BI" xəbər verir ki, gəlirlərini şaxələndirmək istəyən və yüksək əlavə dəyərli neft-kimya gəlirlərini artırmaq istəyən "Saudi Aramco", SABIC üçün təxminən 69 milyard dollar ödəyəcək.
Razılaşmaya görə, "Saudi Aramco", SABIC-in 70 faiz majoritar hissəsini Səudiyyə Ərəbistanı Dövlət İnvestisiya Fondu olan PIF-dən satın alacaq.
"Aramco"nun İcraçı direktoru Amin Nasser, "Bu müqavilə ilə daha güclü və sağlam bir müəssisə yaradacağıq və rəqabət qabiliyyətini artıraraq qlobal müştərilərimizdən artaraq gələn enerji və kimya məhsullarına tələbi ödəyə biləcəyik",- deyib.
"Saudi Aramco", ildə qlobal neft emal həcmini gündəlik 5 milyon barreldən 8-10 milyon barrelə çıxarmaq və bunun ən azı dörddə birini də neft-kimya məhsullarına çevirmək istəyir.
50-dən artıq ölkədə fəaliyyət göstərən SABIC 34 min nəfəri işlə təmin edir və keçən il 45 milyard dollar satış edərək 5.7 milyard dollar xalis gəlir əldə edib.
