Azərbaycanın sığorta və təkrarsığorta brokeri ötən ili zərərlə başa vurub
“Societe de courtage” MMC sığorta və təkrarsığorta brokerinin cəmi aktivləri bu il yanvarın 1-nə 602 min manat təşkil edib.
“BI” şirkətin maliyyə hesabatına istinadən xəbər verir ki, bu, ötən il yanvarın 1-i ilə müqayisədə 57,9% azdır.
2018-ci ildə “Societe de courtage”in öhdəlikləri 72,9% azalaraq 307 min manata, cəmi kapitalı isə 0,3% azalaraq 295 min manata düşüb.
Ötən il sığorta və təkrarsığorta brokerinin gəlirləri 242 min manat (əvvəlki ilə nisbətən 27,55% az), xərcləri 241 min manat (23,5% az) təşkil edib. Son nəticədə, şirkətin maliyyə mənfəəti təxminən 1 000 manat olub ki, bu da illik müqayisədə 19 dəfə azdır.
2018-ci ildə “Societe de Courtage” 2017-ci illə müqayisədə 3,5 dəfə az - təxminən 2 min manat mənfəət vergisi ödəyib və ili təxminən 1 000 manat xalis zərərlə başa vurub. Halbuki, şirkət 2016-ci ildən 11 min manat xalis mənfəətlə çıxmışdı.
Xatırladaq ki, “Societe de Courtage” 2006-cı ildən Azərbaycanda fəaliyyət göstərir, Fransa kapitallı şirkətdir. Onun nizamnamə kapitalı 155,8 min manatdır (o vaxtın məzənnəsi ilə 170 min ABŞ dolları).
