TP-Link ABŞ-da Wi-Fi 8 marşrutlaşdırıcılarının yığımına başlayacaq
Şəbəkə avadanlıqları istehsalçısı TP-Link ABŞ-da yeni nəsil Wi-Fi 8 marşrutlaşdırıcılarının yığılması üçün yerli istehsalçı Key Tronic ilə niyyət məktubu imzalayıb.
ENA.az xəbər verir ki, istehsalın 2027-ci ildə ABŞ-ın Missisipi ştatında yerləşən müəssisədə başlanması planlaşdırılır. Layihənin həyata keçirilməsi ABŞ tənzimləyici qurumlarının razılığından asılıdır.
TP-Link bu addımı ABŞ-da yüksək texnologiyalı istehsalı genişləndirmək və təchizat zəncirini gücləndirmək strategiyasının bir hissəsi kimi təqdim edir. Şirkət daha əvvəl ABŞ-da tədqiqat və istehsal imkanlarına təxminən 1 milyard dollar investisiya yatırmaq planını açıqlayıb.
Qərar ABŞ-da xaricdə istehsal olunan istehlakçı marşrutlaşdırıcılarına tətbiq edilən məhdudiyyətlər fonunda verilib. TP-Link hələlik yeni məhsullarının ABŞ bazarında satışına icazə almaq üçün müvafiq qurumlarla danışıqları davam etdirir.
Bununla belə, istehsalın ABŞ-a köçürülməsi bütün komponentlərin ölkə daxilində istehsal ediləcəyi demək deyil. Şirkət bəzi hissələri xarici təchizatçılardan almağa davam edəcək.
