"Onlara kassadan çeksiz pul verməmişəm"
Bu gün Bakı Ağır Cinayətlər Məhkəməsində mənimsəmədə təqsirləndirilən “Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev, onun bacanağı İsmayıl Hidayət-zadə, sabiq deputat Dünyamin Xəlilov, Camal Həsənov, Sərxan Rəsulov, Natiq İmanov, Samir Hacıyev, Təbriz Əbdülhəmidov, Mahir Qafarov, Sadıx Murtuzayev, Tərlan Məhərrəmov, Fəxrəddin Heybətov, Ramin Əhmədov, Fariz Muradov, Səlahəddin Qədirov, Erxan Cavad, Arif Ramazanov, Navai Şirinov, Svetlana Əsədullayeva, Arif Mədətov, Adil Mikayılov, Ramis Kərimovun cinayət işi üzrə məhkəmə iclası davam etdirilib.
Hakim Faiq Qəniyevin sədrliyi ilə keçirilən prosesdə şahid qismində Həbib Qafarov ifadə verib.
O bildirib ki, daha əvvəl Beynəlxalq Bankın Mərkəzi filalının kassa şöbəsində xəzinadar işləyib. Orta təhsilli olduğunu deyən şahidin sözlərinə görə, bankda işi müştərilərin gətirdiyi kassa-məxaric orderləri və qəbzlərini qəbul etmək olub: "Bankda 25 il işləmişəm. Çalışdığım dövrdə çeksiz müştərilərə kassadan pul verməmişəm. "Siqma line" şirkətinə də çeklə pul vermişəm".
Məhkəmədə şahid təqsirləndirilən S.Hacıyevi tanımadığını, digər təqsirləndirilən İ.Hidayət-zadəyə isə bankın kassasindan bir neçə dəfə pul verdiyini söyləyib.
Daha sonra şahid Vaqif Abbasov dindirilib. O, daha əvvəl Beynəlxalq Bankın Mərkəzi filialında xəzinadar vəzifəsində çalışdığını, hazırda isə Nəsimi filalında işlədiyini qeyd edib. Şahid təqsirləndirilən şəxslərin bir çoxunu tanımadığını deyib.
Digər şahid Oleq Nikolayeviç ifadə verən zaman söyləyib ki, İ.Hidayət-zadənin tikinti şirkətində elektrik işlərini həyata keçirməsinə rəhbərlik edib. O deyib ki, görülmüş işlərin vəsati onun hesabına köçürülüb.
Prosesdə fasilə elan olunub.
Qeyd edək ki, rəsmi məlumata əsasən, aparılmış istintaqla 2001-2015-ci illərdə “Azərbaycan Beynəlxalq Bankı” ASC-nin İdarə Heyətinin sədri vəzifəsində işləmiş C.Hacıyevin göstərişləri əsasında ayrı-ayrı ölkələrdə yaradılmış hüquqi şəxslərlə real dəyəri olmayan sadə veksellərin alqı-satqısına dair 3,4 milyard ABŞ dolları və 987 milyon avro məbləğində (müvafiq dövrün məzənnəsi ilə 3,8 milyard manat) müqavilələr bağlanılaraq qanunsuz veksel əməliyyatları aparılmasına dair əsaslı şübhələr müəyyən edilib.
Aparılmış istintaqla C.Hacıyevin tanışı Dünyamin Xəlilov, digər 20 nəfər və qeyriləri ilə birlikdə qanunsuz maliyyə əməliyyatları aparılan və real dəyəri olmayan veksellərin alınması, eləcə də təminatı olmayan kreditlərin verilməsi yolu ilə ümumilikdə 4,7 milyard manat məbləğində pul vəsaitinin mənimsəmə və digər cinayətlər yolu ilə 2,5 milyard manat hissəsini ələ keçirməklə cinayət yolu ilə əldə edilmiş həmin vəsaitin 2 milyard manatını leqallaşdırmasında, digər 2,2 milyard manat məbləğində pul vəsaitinin isə müxtəlif əməliyyatlara yönəltməklə “Azərbaycan Beynəlxalq Bankı” ASC-yə ziyan vurmasına əsaslı şübhələr müəyyən edilib.
Xatırladaq ki, C.Hacıyev Bakı Ağır Cinayətlər Məhkəməsinin hökmü ilə 15 il, D.Xəlilov 13 il və İ.Hidayət-zadə isə 7 il müddətinə azadlıqdan məhrum edilib. Bakı Apllyasiya Məhkəməsinin qərarı ilə D.Xəlilovun cəzası 13 ildən 12 il 9 aya, Ali Məhkəmə isə İ.Hidayət-zadənin cəzasını 5 ilə endirib.
