BP: "Şahdəniz"in ehtiyatları təkcə Britaniyanı 10 il enerji ilə təmin etməyə kifayətdir
"Şahdəniz" yatağının ehtiyatları təkcə Böyük Britaniyanı 10 il ərzində enerji ilə təmin etməyə kifayət edər.
Bunu BP şirkətinin Azərbaycan, Gürcüstan və Türkiyə üzrə regional prezidenti Cio Kristofoli 31-ci Bakı Enerji Forumunda bildirib.
Onun sözlərinə görə, bu, həqiqətən enerji təhlükəsizliyinin əsas sütunudur: "Ehtiyatlar nəhəngdir, 28 trilyon kubfut qaz var. Biz, əlbəttə, bu ehtiyatlardan hasilatı maksimum artırmağa davam etmək üçün investisiya qoyuruq. Məsələn, proqramdakı bir sıra quyularla qazmanı davam etdiririk. Həmçinin kompressor qurğusunun quraşdırılmasına 2,9 milyard ABŞ dolları investisiya yatırırıq. Yeri gəlmişkən, o, bir ay ərzində tam elektrikləşdiriləcək. Bu, Xəzərdə belə mürəkkəblik səviyyəsində ilk qurğudur. Beləliklə, böyük ehtiyatlarla, əlimizdə olandan hasilatı maksimum artırmağa davam etmək üçün investisiya qoyuruq".
O bildirib ki, texnologiyanı düzgün düşüncə tərzinə malik insanlarla birləşdirmək və iş prosesinə daxil etmək lazımdır: "Əks təqdirdə, texnologiya vasitəsilə çox şey əldə etmək olmaz. Məsələn, "Şahdəniz"də yeni quyular sənayedə qazılması ən çətin quyulardan biridir. Bu yaxınlarda biz "idarə olunan palçıq xətti" adlı texnologiya tətbiq etdik, burada quyudakı palçığın çəkisini dəqiq tənzimləyirik. Biz təzyiqin çatlama təzyiqini aşmamasını təmin edirik, çünki əks halda bütün palçığı lay daxilinə itirərik. Lakin təzyiq çox aşağı da olmamalıdır. "Şahdəniz" layının mürəkkəbliyi o dərəcədədir ki, bu təzyiq pəncərəsi çox kiçikdir. Beləliklə, bu təzyiqi həqiqətən dəqiq tənzimləmək üçün Xəzərdə ilk dəfə yeni texnologiya tətbiq etdik".
