Neft "İran xəbəri" ilə ucuzlaşır
Beynəlxalq fyuçers bazarlarında Brent markalı xam neftin qiyməti 110,33 dollardan satılır.
Dünən Brent markalı xam neftin qiyməti günü 112,10 dollardan bağlamazdan əvvəl 112,72 dollara yüksəldi.
Brent markalı xam neftin fyuçerslərinin qiyməti hazırda təxminən 1,6 faiz azalaraq 110,33 dollar civarında satılır. Qərbi Texas Intermediate (WTI) markalı xam neftin qiyməti 103,59 dollardan satılır.
Qiymətlərin enişinə ABŞ prezidenti Donald Trampın İrana planlaşdırılan hücumu təxirə salması və Rusiya neft alışı üçün sanksiya güzəştlərinin uzadılması təsir edib.
Tramp Yaxın Şərqdəki bəzi ölkələrin İranla danışıqlarda razılığa gəlməyə yaxın olduğunu bildirərək dedi: "(İrana yeni hücum) Mən bunu bir müddət, ümid edirəm ki, əbədi olaraq, amma yəqin ki, yalnız bir müddət təxirə saldım."
Ağ Evdə keçirilən tədbirdən sonra jurnalistlərə açıqlama verən Tramp bildirib ki, Səudiyyə Ərəbistanı, Birləşmiş Ərəb Əmirlikləri (BƏƏ) və Qətər liderləri ona zəng edərək İranla danışıqlarda "razılığa yaxın olduqlarını" və İrana planlaşdırılan hücumu təxirə salmalarının səbəbinin də məhz bu olduğunu bildiriblər.
Bundan əlavə, ABŞ Maliyyə Naziri Skott Bessent İranla müharibə səbəbindən enerji çatışmazlığı yaşayan ölkələrin Rusiya neftini almasına imkan verən sanksiya güzəştinin 30 gün uzadıldığını açıqlayıb.
Bu qərar, tankerlərdə daşınmasını gözləyən Rusiya nefti və neft məhsullarının ABŞ-ın Rusiya enerji şirkətlərinə tətbiq etdiyi ağır sanksiyaları pozmadan müvəqqəti olaraq bazara buraxılmasına imkan verəcək.
ABŞ-da yerləşən X şirkətinin sosial media hesabında paylaşım edən Bessent bildirib ki, "Bu uzadılma əlavə rahatlıq təmin edəcək və biz lazım olduqda bu ölkələrə xüsusi lisenziyalar vermək üçün çalışacağıq. Bu ümumi lisenziya fiziki xam neft bazarını sabitləşdirməyə və neftin ən çox enerjiyə həssas ölkələrə çatmasını təmin etməyə kömək edəcək".
Texniki olaraq, Brent xam neftində 111.49 dollar müqavimət səviyyəsi, 109.26 dollar isə dəstək səviyyəsi kimi müşahidə edilə bilər.
