Neft "Səudiyyə Ərəbistanının qərarı" ilə düşdü 05.06.2025
Neft, ABŞ-da benzin və dizel ehtiyatlarının artması və Səudiyyə Ərəbistanının iyul ayı üçün xam neftin qiymətini Asiya alıcılarına endirməsindən sonra ucuzlaşıb.
Brent markalı neftin fyuçersləri 0,3 faiz ucuzlaşaraq barreli 64,65 dollar olub. ABŞ xam nefti 0,5 faiz ucuzlaşaraq 62,58 dollar olub.
Çərşənbə günü neft qiymətləri təxminən 1 faiz ucuzlaşıb. Azalma ABŞ Enerji İnformasiya Administrasiyasının (EIA) rəsmi məlumatlarının benzin və distillə ehtiyatlarının gözlənildiyindən daha çox artdığını göstərdikdən sonra baş verib ki, bu da dünyanın ən böyük iqtisadiyyatında zəif tələbi əks etdirir.
Neft qiymətlərinin zəifləməsinə təsir edən digər amil dünyanın ən böyük neft ixracatçısı olan Səudiyyə Ərəbistanının Asiya alıcılarına satdığı neftin iyul ayı qiymətini təxminən dörd ilin minimumuna endirməsi olub.
Səudiyyə Ərəbistanının qiymət endirimi Neft İxrac Edən Ölkələr Təşkilatı (OPEC) və onun Rusiya kimi müttəfiqlərindən ibarət OPEC+ qrupunun həftə sonu iyul ayı üçün hasilatı gündəlik 411 min barel artırmaq qərarına gəlməsindən sonra baş verib.
