Bank BTB-nin depozit portfelinin 94%-i əhalinin pullarından formalaşıb. Əhalinin əmanətləri daha çox hansı banklardadır?

Azərbaycanda ümumi depozit portfeli 40 milyard manatdır. Bunun 14 milyard 661 mln manatı ev təsərrüfatlarının pullarıdır. Bu pulların cəmi 5 milyard 580.2 milyonu manatla, 3 milyard 22.8 milyonu isə xarici valyutada olan müddətli depozitlərdir.

Ümumilikdə Depozit portfelinin 62.1%-i (23,397.5 mln. manat) hüquqi şəxslərin, 37.9%-i (14,299.1 mln. manat) fiziki şəxslərin vəsaitləridir. Yerigəlmişkən bir faktı da diqqətinizə çatdıraq ki, fiziki şəxslərin vəsaitlərində cari kart hesabındakı vəsaitlər də oturur.

ENA.az saytı olaraq, ölkəmizdə bank fəaliyyəti göstərən maliyyə qurumlarında fiziki şəxslərin əmanətlərin həcmi üzrə sıralamasını təqdim edirik. Bu sıralamada həmçinin, fiziki şəxslərin vəsaitlərinin ümumi portfeldə payı üzrə hər bir banka düşən göstəricini hesabladıq.

Mənzərədən belə görünür ki, əhalinin əmanətlərinin hesabına depozit portfeli formalaşan bankların sırasında ilk üç lider – Bank BTB, Bank of Baku və  Bank Avrasiyadır. Bu banklardakı fiziki əmanətlərin 90%-in üzərində olması isə o qədər də yaxşı göstərici deyil. Nəzərə almaq lazımdır ki, depozit portfelinin diversifikasiyası da mühüm amildir və portfelin 94 faiz bir mənbədən formalaşması risklilik baxımından ürəkaçan rəqəm deyil.

Bu həm də  hüquqi şəxslərin, şirkətlərin bu banklarda hesablarının çox cüzi olmasını göstərir.