Fevralda Azərbaycanda bank aktivləri yarım milyarddan çox azaldı - RƏQƏMLƏR
Azərbaycanda fəaliyyət göstərən bankların aktivləri bu ilin iki ayında azalıb. Belə ki, Azərbaycan Mərkəzi Bankının məlumatına görə, 29 fevral 2024-cü il tarixinə Azərbaycanın bank sisteminin cəmi aktivləri 48 milyard 735,67 milyon manat olub. 31 dekabr 2023-cü il tarixinə Azərbaycanda bankların aktivlərinin 49 milyard 178,19 milyon manat təşkil etdiyini nəzərər alsaq, demək 2024-cü ilin yanvar-fevral aylarında bankların aktivləri 0,9% azalıb.
Azalma fevralda baş verib. Çünki yanvarda 118,6 milyon manat artım qeydə alınmışdı. Fevralda bankların cəmi aktivləri 561,1 milyon manat azalıb. Bunun hansı bankla bağlı olduğunu demək hələki dəqiq mümkün deyil, amma yarım milyard azalmada iri bankların olması şübhə doğurmur.
Mərkəzi Bankdakı müxbir bank hesablarındakı vəsaitlərinin həcmi 2023-cü ilin sonu ilə müqayisədə yanvar-fevral aylarında 1,9% azalaraq 6 milyard 266,3 milyon manata düşüb. Fevralın sonuna bankların kredit portfeli 2,8% artaraq 23 milyard 833 milyon manat təşkil edib.
Bankların öhdəlikləri 1,3% azalaraq 42 milyard 548,4 milyon manata bərabərdir. O cümlədən, bankların Azərbaycan Mərkəzi Bankı qarşısında öhdəlikləri 47,1 milyon manat olub və bu göstərici dəyişməyib. Banklardakı depozit portfeli 1,2 faiz artaraq 34 milyard 959,3 milyon manat təşkil edib. Əhalinin əmanətləri isə 3,3 faiz artımla 13 milyard 3,6 milyon manata çatıb.
Azərbaycanda bankların ümumi kapitallaşması 2 faiz artaraq 6 milyard 187,25 milyon manat təşkil edib.
Tənzimləyicinin məlumatına görə, 2024-cü ilin yanvar-fevral aylarında bankların məcmu xalis mənfəəti ötən ilin eyni dövrü ilə müqayisədə 34,7% artaraq 209,84 milyon manat olub.
Hesabat dövründə bankların əsasən kreditlərdən formalaşan faiz gəlirləri 16,8% artaraq 641,7 milyon manata yüksəlib. Verilmiş kreditlər üzrə 482,19 milyon manat faiz toplanıb. Bankların qeyri-faiz gəlirləri 51,5% artaraq 269,55 milyon manat olub.
Bankların faiz xərcləri 28,7% artaraq 172,47 milyon manatdır. Burada depozitlər üzrə faizlərə ödənilən vəsait 125,46 milyon manat olub. Bu isə 30,3% artım deməkdir.
Bankların qeyri-faiz xərcləri 29,5% artaraq 427,8 milyon manata bərabərdir.
2024-cü ilin yanvar-fevral aylarında Azərbaycanın bank sektorunun əməliyyat mənfəəti 19% artaraq 298,27 milyon manat təşkil edib.
Ümumilikdə, hesabat dövründə bankların vergidən əvvəlki məcmu mənfəəti 29% yüksəlib və 257,98 milyon manat, mənfəət vergisi ödənişləri 8,8% artımla 48,1 milyon manatdır.
Qeyd edək ki, 1 mart 2024-cü il tarixinə Azərbaycanda 23 bank, o cümlədən 9 xarici kapitallı bank fəaliyyət göstərmək üçün lisenziyaya malikdir.
Ümumilikdə bankların 475 filial və 104 filial şəbəkəsi var. Azərbaycanın bank sektorunda 23 878 nəfər çalışır.
