Milli Depozit Mərkəzinin İdarə Heyətinin yeni tərkibi təsdiqləndi
Azərbaycan Respublikasının Milli Depozit Mərkəzinin (MDM) Müşahidə Şurasının 28 sentyabr 2023-cü il tarixli qərarı ilə MDM-in İdarə Heyətinin yeni tərkibi təsdiq edilmişdir. Qərara əsasən, MDM-in İdarə Heyəti sədrinin müavini Rəna Aydın qızı İsgəndərova, İdarə Heyətinin üzvü isə Ramin Qələnfər oğlu Nurəhmədov təyin edilib. Bu barədə Banker.az-a MDM-dən məlumat daxil olub.
Rəna Aydın qızı İsgəndərova 1992-ci ildə Bakı şəhərində anadan olmuşdur. Bakalavr təhsilini Birləmiş Krallığın City University London universitetində (CASS Business School) “bank işi və beynəlxalq maliyyə” ixtisası üzrə yüksək dərəcə ilə tamamlayan İsgəndərova eyni zamanda Böyük Britaniyanın “Bellerbys College”-ni yüksək dərəcə ilə bitirmişdir. Hal-hazırda isə beynəlxalq mühasiblər assosiasiyası olan ACCA (Chartered Certified Accountants Association) üzvlüyünə namizəddir. Bank sektorunda maliyyə məlumatlarının və proseslərin düzgünlüyünün, etibarlılığının və uyğunluğunun təmin edilməsində 7 ildən çox təcrübəyə malik olan Rəna İsgəndərova, əmək fəaliyyətinə 2015-ci ildə beynəlxalq məsləhət şirkəti olan ” Deloitte & Touche “-da audit mütəxəssisi olaraq başlamış və 2017-ci ilə kimi bu şirkətdə müxtəlif vəzifələrdə çalışmışdır. 2017-ci ildən etibarən isə kariyerasına beynəlxalq məsləhət şirkəti olan “Ernst & Young”-da baş mütəxəssis və sonrasında audit üzrə menecer vəzifələrində davam etmişdir.
Ramin Nurəhmədov 1980-ci ildə Bakı şəhərində anadan olmuşdur. 2001-ci ildə Azərbaycan Universitetini “Hüquqşünaslıq” ixtisası üzrə fərqlənmə diplomu ilə bitirmişdir. 2011-ci ildə Azərbaycan Dövlət İqtisad Universitetinin “Beynəlxalq İqtisadi Münasibətlər” ixtisası üzrə bitirmişdir. Əmək fəaliyyətinə 2002-ci ildə “HRG-Azerbaijan” turizm şirkətində korporativ xidmətlərin göstərilməsi sahəsində başlamışdır. 2005-2016-cı illər ərzində Azərbayan Respublikasının Qiymətli Kağızlar üzrə Dövlət Komitəsində müxtəlif vəzifələrdə, o cümlədən sektor müdiri vəzifəsində çalışmışdır. 1-ci dərəcə dövlət qulluqçusudur. Qiymətli kağızlar bazarı haqqında Qanunun hazırlanmasında, Avropa Şurasının “Twinning” və “TAIEX” layihələri çərçivəsində kapital bazarının inkişafı üzrə ölkə qanunvericiliyinin Avropa direktivlərinə uyğunlaşdırılması məqsədi ilə normativ aktların ekspertizasında və qiymətli kağızlar bazarında sui-istifadələrin qarşısının alınması, məlumatların açıqlanması üzrə normativ aktların hazırlanmasında fəal iştirak etmişdir. 2016–2021-ci illər ərzində “Azərpoçt” MMC-də 1 saylı poçt filialının rəis müavini, rəisi vəzifələrində çalışmışdır. 1 saylı poçt filialının Mərkəzi Poçt Şöbəsinin nəzdində “Şəbəkə” Xidmət Mərkəzinin formalaşmasında fəal iştirak etmişdir. 2021-ci ildən 2023-cü ilədək “AzFinance” İnvestisiya Şirkətində Kapital Bazarının İnkişafı Departamentinin rəhbəri kimi fəaliyyətini davam etdirmiş, qiymətli kağızlar sahəsində bir neçə layihələrdə iştirak etmişdir. 2023-cü ilin iyul ayından etibarən Milli Depozit Mərkəzində fəaliyyətə başlamış və İdarə Heyəti sədrinin müşaviri vəzifəsində çalışmışdır.
