Rusiyada magistral yollarda məhdudiyyətlər aradan qaldırılıb
Rusiyada magistral yollarda antiterror rejiminə görə tətbiq edilmiş bütün məhdudiyyətlər aradan qaldırılıb.
ENA.az xəbər verir ki, bu barədə "Rosavtodor"un mətbuat xidməti məlumat yayıb.
Bundan əvvəl Rostov, Lipetsk, Voronej, Tula vilayətlərində və digər vilayətlərdə yolların hissələri bağlanıb.
Xatırladaq ki, iyunun 23-də “Vaqner” Xüsusi Hərbi Şirkətin başçısı Yevgeni Priqojin Rusiya Müdafiə Nazirliyini onun şirkətinin mövqelərinə zərbələr endirməkdə ittiham edib və 25 min insanın “məsələni aydınlaşdırmağa” hazırlaşdığını bildirib. Səhər saatlarında o, Rostov şəhərində bütün hərbi obyektlərin nəzarətə götürüldüyünü açıqlayıb.
Bundan sonra Rusiya Federal Təhlükəsizlik Xidməti Yevgeni Priqojinə qarşı silahlı üsyana təhrik faktı üzrə cinayət işi açıb, Prezident Vladimir Putin isə onun hərəkətlərini qiyam adlandırıb. Mümkün terror aktlarının qarşısının alınması məqsədilə Moskva şəhərində, Voronej və Moskva vilayəti ərazisində antiterror əməliyyatı rejimi tətbiq edilib.
