Avropadan gələn müsbət xəbərlər nefti bahalaşdırdı

Bazar ertəsi günortadan sonra neft qiymətləri Avropa iqtisadiyyatı üçün artım proqnozunun yaxşılaşmasından sonra bahalaşıb.Bakı vaxtilə saat 15.12-də Londonun ICE Futures birjasında Brent markalı neftin iyul fyuçerslərinin dəyəri bir barel üçün 74,56 dollar təşkil edir ki, bu da əvvəlki sessiyanın bağlanış qiymətindən 0,39 dollar (0,53%) çoxdur.

ENA.az xəbər verir ki, Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI markalı neftin iyun fyuçerslərinin qiyməti bu dəfə 0,42 dollar (0,6%) artaraq bir barelə görə 70,46 dollar təşkil edib.

Qeyd edək ki, ötən həftənin sonunda Brent 1,5%, WTI 1,8% ucuzlaşıb.

Treyderlər çərşənbə axşamı Beynəlxalq Enerji Agentliyinin (IEA) neft bazarına dair aylıq icmalını və Çin və ABŞ-da sənaye istehsalı ilə bağlı aprel ayı məlumatlarını səbirsizliklə gözləyirlər.

Eyni zamanda, Avropa Komissiyası 2023-cü ildə Avropa İttifaqı iqtisadiyyatının artımı ilə bağlı proqnozunu əvvəllər gözlənilən 0,8%-dən 1%-ə qədər yaxşılaşdırıb.