ASA əmlak sığortası ilə bağlı əhaliyə xəbərdarlıq etdi

Azərbaycan Sığortaçılar Assosiasiyası daşınmaz əmlakın icbari sığortası ilə bağlı ölkə vətəndaşlarına və sahibkarlıq subyektlərinə xəbərdarlıq edib.

ASA-dan verilən məlumata görə, xəbərdarlıqda bildirilir ki, daşınmaz əmlakın icbari sığortası növü üzrə şəhadətnamələrin qüvvədə olma müddəti 1 ildir və ötən ilin bu vaxtlarında müvafiq növ üzrə əldə edilmiş şəhadətnamələrin müddədi bu günlərdə bitmək üzrədir:

“Daşınmaz əmlakın icbari sığortası Azərbaycan Respublikasının “İcbari sığortalar haqqında” Qanunu ilə tənzimlənir və ölkəmizin əmlak sahibi olan hər bir fərdi üçün məcburi xarakter daşıyır. Daşınmaz əmlakın icbari sığortası növü üzrə şəhadətnamələrin qüvvədə olma müddətinin 1 il təşkil etdiyini və ötən ilin bu vaxtlarında müvafiq növ üzrə əldə edilmiş şəhadətnamələrin müddətinin bu günlərdə bitmək üzrə olduğunu nəzərə alaraq Azərbaycan Sığortaçılar Assosiasiyası olaraq ölkəmizdə əmlak sahibi olan vətəndaşlara və sahibkarlıq subyektlərinə adı çəkilən növ üzrə şəhadətnamələrini yeniləməli olduqlarını xatırladırıq. Xəbərdarlıq edirik ki, əks təqdirdə onlar müəyyən cərimə və məhdudiyyətlərlə üzləşə bilərlər”.

Azərbaycan Sığortaçılar Assosiasiyasının İcraçı direktoru Elmar Mirsalayev tərəfindən açıqlanan xəbərdarlıqda daşınmaz əmlakın icbari sığortası növü üzrə sığortalanmayanlara şamil edilən müvafiq cərimə və məhdudiyyətlər də qeyd olunub:

“Azərbaycan Respublikasının İnzibati Xətalar Məcəlləsində müvafiq riskləri icbari qaydada sığorta etdirməyən şəxslərin cərimələnməsi nəzərdə tutulur. Bu cərimələr də fiziki şəxslər üçün 30 manat, vəzifəli şəxslər üçün 80 manat, hüquqi şəxslər üçün isə 200 manatdır.

Bundan əlavə olaraq, daşınmaz əmlakını icbari qaydada sığorta etdirməyən vətəndaş və sahibkarlar digər müəyyən məhdudiyyətlərlə də üzləşə bilərlər. Bu məhdudiyyətlər əsasən ev-əmlak alqı-satqısı və ya girov əməliyyatları zamanı ortaya çıxa bilər.”

İcraçı direktor xəbərdarlıq açıqlamasında daşınmaz əmlakın icbari sığortası ilə bağlı tarif və təminatlara da toxunub. O bildirib ki, adı çəkilən növ üzrə sığorta tarifləri və təminatlar bölgələrə və obyektin təyinatına görə dəyişir:

“Yaşayış təyinatlı daşınmaz əmlaklar üçün Bakı şəhəri üzrə sığorta tarifi 50 manat, sığorta təminatı 25 min manata qədər, Gəncə, Sumqayıt və Naxçıvan şəhərləri üzrə sığorta tarifi 40 manat, sığorta təminatı 20 min manata qədər, respublikanın digər rayon və şəhərləri üzrə isə sığorta tarifi 30 manat, sığorta təminatı 15 min manata qədərdir.

Yaşayış evləri və mənzillər istisna olmaqla digər daşınmaz əmlakın icbari sığortası üzrə sığorta məbləğləri isə həmin əmlakın yerləşdiyi yerdə eyni cür tikilinin və binanın inşasının dəyəri – bərpa dəyəri məbləğinə uyğun olaraq müəyyən olunur. Eyni zamanda bərpa dəyəri müəyyən edilərkən materialların köhnəlmə əmsalı və sığorta predmeti olan əmlakın texniki vəziyyəti də nəzərə alınır. Qeyri-yaşayış sahələri üzrə sığorta predmeti olan əmlakın yerləşdiyi yerdə eyni cür və həmin texniki vəziyyətdə olan əmlakın orta bazar dəyəri məbləğində müəyyənləşdirilir”.