“Azərxalça”nın keçmiş sədrinin 30 milyonluq əmlakı müsadirə edildi
“Azərxalça”nın keçmiş sədri ilə bağlı məhkəmə prosesi yekunlaşdı. “Azərxalça” ASC-nin İdarə Heyətinin sabiq sədri, 2021-ci il noyabrın 5-də – ev dustaqlığına buraxılandan 5 gün sonra vəfat edən Vidadi Muradov 21 milyonluq yeyinti, 640 mindən artıq vergidən yayınmada təqsirli bilinib.
Yanvarın 28-də Bakı Ağır Cinayətlər Məhkəməsində hakim Əfqan Hacıyevin sədrliyilə çıxarılan hökmdə bildirilir ki, Vidadi Muradova qarşı ittihamlar məhkəmə araşdırması zamanı sübuta yetirilib. Lakin ölümüylə əlaqədar onun barəsində cinayət işinə xitam verilir.
Bununla belə, məhkəmə yeyinti nəticəsində dövlət büdcəsinə dəymiş ziyanın ödənilməsi, o cümlədən Dövlət Vergi Xidmətinin qaldırdığı 640 min 922 manatlıq mülki iddianın təmin olunması üçün Vidadi Muradov və ailə üzvlərinin əmlaklarının müsadirəsinə qərar verib.
“Azərxalça”nın sabiq rəhbərinin işi üzrə Korrupsiyaya Qarşı Mübarizə İdarəsində istintaq tamamlanıb, iş məhkəməyə göndərilən ərəfədə Baş Prokurorluğun bu haqda yaydığı məlumatda bildirilirdi ki, Vidadi Muradov və ailə üzvlərinin adlarına olan, ümumi dəyəri 30 milyon 587 min manatlıq evlər, qeyri-yaşayış sahələri, həmçinin “Azər-İlmə” MMC-nin səhm payları və aktivlərinin üzərinə məhkəmə qərarıyla həbs qoyulub.
Üzərində həbs olan əmlakın 19 milyon 144 min 554 manatlıq hissəsi evlər, qeyri-yaşayış sahələridir. Müsadirəsi istənilən 11 milyon 442 min 490 manatlıq əmlak isə Vidadi Muradovun təsisçisi olduğu “Azər-İlmə” MMC-nin səhm payları və aktivləridir.
Yanvarın 28-də məhkəmədə hökmdən əvvəl Vidadi Muradovun vəkili Vüqar Babayev çıxış edib. O, cinayət işinə bəraətverici əsaslarla xitam verilməsini, əmlaklar üzərinə qoyulmuş həbsin götürülməsini xahiş edib.
Müdafiəçi deyib ki, üzərinə həbs qoyulmuş əmlaklardan yalnız “Azər-İlmə” və onun ətrafındakı qeyri-yaşayış sahəsi, eləcə də Həsən Əliyev küçəsindəki ev Vidadi Muradova aiddir. Digər əmlakların bir hissəsini isə “Azərxalça”nın rəhbəri olmamışdan əvvəl əldə edib, ona görə də bu ittihama aidiyyəti yoxdur. Vəkilin sözlərinə görə, digər əmlaklar oğlu Aydın Muradova aiddir.
Lakin məhkəmə Həsən Əliyev küçəsindəki ev istisna olmaqla, digər əmlakların müsadirə olunmasına qərar verib.
Vidadi Muradov 2021-ci ilin yanvarında həbs edilib. İttihamda yazılıb ki, o, təsisçisi olduğu şirkətin – “Azər-İlmə” MMC-nin Bakıda yerləşən inzibati binasını “Azərxalça” ASC-yə bazar qiymətlərindən daha baha qiymətə icarəyə verib.
“Azərxalça” ASC-nin xalça istehsalı üçün ip alınması məqsədilə nəzərdə tutulan vəsaiti yalnız formal mövcud olan, əslində isə ip satışıyla məşğul olmayan şirkətlərin hesabına köçürülüb. Sözügedən şirkətlərin rəhbərləri köçürülmüş vəsaiti hesabdan çıxarıb yenidən “Azərxalça” rəhbərliyinə geri qaytarıblar. “Azərxalça”nın müxtəlif bölgələrdə 23 müəssisəsinin tikintisi zamanı qiymətlərin şişirdilməsi, daha ucuz və keyfiyyətsiz materiallarla işlərin görülməsi nəticəsində də külli miqdarda vəsaitin mənimsənildiyi iddia olunur.
Vidadi Muradova Cinayət Məcəlləsinin 179.4 (mənimsəmə və ya israf etmə- xüsusilə külli miqdarda ziyan vurmaqla törədildikdə), 213.3 (vergiləri ödəməkdən yayınma- xüsusilə külli miqdarda törədildikdə), 308.2 (vəzifə səlahiyyətlərindən sui-istifadə etmə- ağır nəticələrə səbəb olduqda) və 313-cü (vəzifə saxtakarlığı) maddələri ilə ittihamlar verilib.
Vidadi Muradovun oğlu Cavid Muradov Bakının Sabunçu rayon Polis İdarəsinin rəisidir. Bir neçə ay əvvələ qədər isə o, Səbail rayonunda eyni vəzifədə çalışırdı.
