Azərbaycanda minik avtomobili istehsalı azalıb
2021-ci ilin yanvar-iyul aylarında Azərbaycanda 940 ədəd minik avtomobili istehsal edilib. Bu, 2020-ci ilin müvafiq dövrü ilə müqayisədə 12,5% azdır.
Yanvarda 96, fevralda 120, martda 192, apreldə 100, mayda 145, iyunda 142, iyulda 145 ədəd avtomobil istehsal edilib.
1 avqust 2021-ci il tarixinə anbarlarda 141 ədəd minik avtomobili var.
Bu dövrdə Azərbaycanda traktor istehsalı 3,9 dəfə artaraq 407-ə çatıb. Avqustun 1-nə anbarlarda 60 ədəd traktor var.
Qeyd edək ki, Azərbaycanda (Neftçala, Gəncə və Naxçıvanda) avtomobil istehsalı üzrə 3 zavod fəaliyyət göstərir. Eyni zamanda, Gəncə avtomobil zavodunda kənd təsərrüfatı texnikası da istehsal olunur. Hazırda avtomobil istehsalı yalnız Neftçala avtomobil zavodunda həyata keçirilir.
Ortamüddətli perspektivdə Azərbaycanda avtomobil istehsalının ildə 5 min ədədə çatdırılması nəzərdə tutulur.
2020-ci ildə Azərbaycanda 1,949 min ədəd avtomobil istehsal olunub ki, bu da 2019-cu ilin göstəricisindən 17,4% azdır. Ötən il respublikada 300 ədəd müxtəlif təyinatlı traktor (azalma 66,9%) istehsal edilib. İstehsalın azalması COVID-19 səbəbindən müəssisələrin fəaliyyətinin məhdudlaşdırılması ilə şərtlənib.
