Rusiyanın premium avtomobillərinin istehsalına başlanılır
May ayında Rusiyanın premium avtomobilləri olan Aurus Senat-ın Yelabuqa (Tatarıstan) zavodunda seriyalı istehsalına başlanacaq.
ENA.az xəbər verir ki, bu barədə Rusiya Sənaye və Ticarət Nazirliyinin mətbuat xidmətindən məlumat verilib.
"Yelabuqadakı (ya da Alabuqa) Aurus-un seriyalı istehsalına May ayında başlanacaq, layihə əvvəllər elan edilmiş plana tam uyğun olaraq irəliləyir”,- Nazirlikdən bildirilib.
Aurus Senat avtomobilinin baza versiyasının satış qiyməti 18 milyon rubl (402 min manat), yüksək performanslı versiyasının qiyməti isə 22 milyon rubl (491 min manat) təşkil edəcək. Sənaye və Ticarət Nazirliyindən verilən məlumata görə, avtomobillər ilk müştərilərə may ayında təhvil veriləcək.
Gələcəkdə Yelabuqadakı zavod Aurus Komendant adlı yolsuzluq avtomobillərini də istehsal edəcəkdir. Yeniliyin 2020-ci ildə Moskvada “Motor Show”da təqdim ediləcəyi planlaşdırılmışdı, ancaq pandemiya səbəbindən tədbir ləğv edilib.
Nazirliyin 2019-cu ilin sonunda təqdim etdiyi plana görə, Aurus Senat sedanının seriya istehsalına başlanılması 2021-ci ilin birinci rübünə nəzərdə tutulmuşdu. Bu ilin mart ayında satış üçün nəzərdə tutulmayan Aurus-un ilk pilot partiyasının buraxıldığı məlum oldu, avtomobillər sınaq üçün NAMI-yə (Rusiyanın Avtomobillər üzrə Mərkəzi Elmi İnstitutu) göndərildi.
Aurus, limuzin, sedan, minivan və yolsuzluq avtomobili təqdim edən ilk rus lüks avtomobil markasıdır. Layihə "Cortege" kod adı ilə qəbul edilib və Vadim Şvetsovun “Sollers” qrupunun və Birləşmiş Ərəb Əmirliklərindən (BƏƏ) “Tawazun” fondunun köməyi ilə dövlətə məxsus NAMI institutu tərəfindən həyata keçirilir. Layihəyə dövlət investisiyaları 12,4 milyard rubl təşkil etmişdir. Aurus-un səhmdarları FSUE NAMI (% 63,5), BƏƏ-nin Müdafiə, Təhlükəsizlik və İnkişaf Fondu “Tawaz”un (% 36) və “Sollers”dır (% 0,5).
