Azərbaycan banklarının xalis mənfəəti 25 %-dən çox azalıb
Azərbaycanın bank sektoru bu ilin yanvar-fevral aylarında 73,1 milyon manat xalis mənfəət əldə edib.
“ENA” Azərbaycan Mərkəzi Bankına istinadən xəbər verir ki, bu, ötən ilin eyni dövrü ilə müqayisədə 25,3 % azdır.
Hesabat dövründə bankların faiz gəlirləri 324,9 milyon manat (azalma 2,7%), o cümlədən verilmiş kreditlər üzrə faiz gəlirləri 259,3 milyon manat təşkil edib.
Hesabat dövründə bankların qeyri-faiz gəlirləri 104,8 milyon manat (azalma 4,6%) olub. Həmçinin faiz xərcləri 85,7 milyon manat (7,3% az), o cümlədən depozitlər üzrə faiz xərcləri 54,5 milyon manat təşkil edib. Bankların qeyri-faiz xərcləri isə 195 milyon manata (artım 0,6%) yüksəlib.
Azərbaycanda bank sektorunun əməliyyat mənfəəti 2021-ci ilin yanvar-fevral aylarında 137 milyon manatdır (azalma 6,3%).
Beləliklə, iki ay ərzində bankların əməliyyat gəlirləri 429,7 milyon manat (ötən ilin eyni dövrünə nisbətən 3,2 % az), əməliyyat xərcləri 280,7 milyon manat (1,9 % az), xüsusi ehtiyatlara ayırmaları 59,7 milyon manat (42,5 % az), mənfəət vergisi ödəmələri isə 16,2 milyon manat (9,5 % az) təşkil edib.
Azərbaycan Mərkəzi Bankının məlumatlarına görə, 28 fevral 2021-ci il tarixinə Azərbaycanın bank sisteminin cəmi aktivləri 32 milyard 203,4 milyon manatdır.
Daha əvvəl də bildirildiyi kimi, 1 yanvar 2021-ci il tarixinə bankların Azərbaycandakı aktivləri 32 milyard 55,3 milyon manat təşkil etmişdir. Beləliklə, yanvar-fevral aylarında bankların aktivləri 0,5% artıb.
Fevral ayının sonunda bankların kredit portfeli 14 246,1 milyon manat, ümumi kapitallaşması 4 milyard 765,7 milyon manata bərabərdir.
Hesabat dövrünün sonunda bankların öhdəlikləri 27 milyard 437,7 milyon manata (artım 0,3%) çatıb. Xüsusilə bankların Azərbaycan Mərkəzi Bankı qarşısında öhdəlikləri 0,2% azalaraq 373,6 milyon manat təşkil edib. Mart ayının əvvəlində banklardakı depozit portfeli 0,3% kiçilərək 20 milyard 653,8 milyon manata enib. Əhalinin depozitləri 2,5% artaraq 8 milyard 247,5 milyon manat olub.
28 Fevral 2021-ci il tarixinə, xarici kapitallı 12 bank daxil olmaqla 26 bankın Azərbaycanda fəaliyyət göstərmək üçün lisenziyası var.
Ümumiyyətlə, fevral ayının sonunda bankların 457 filialı (2020-ci ilin sonuna nisbətən 0,4% artım) və 89 filialı (azalma 18,3%) olub.
Hesabat dövrünün sonunda Azərbaycanın bank sektorunda 18724 nəfər çalışır, bu isə 2020-ci ilin sonundakı göstərici ilə müqayisədə 0,1% artım deməkdir.
