Sumqayıt Kimya Sənaye Parkında YENİ REZİDENT
İqtisadiyyat Nazirliyinə məxsus "Sumqayıt Kimya Sənaye Parkı" MMC-də yeni rezident - “Novus Plastica” MMC qeydiyyata alınıb və bununla da Parkın rezidentlərinin sayı 24-ə çatıb.
Bu barədə nazirlikdən bildirilib.
Məlumata görə, yeni rezident Parkın ərazisində “Polimer materialların emalı” layihəsi həyata keçirəcək. Layihə çərçivəsində yaradılacaq müəssisədə Yaponiya və Almaniyanın qabaqcıl texnologiyalarının tətbiqi ilə iki istiqamət üzrə - polietilen borular üçün qara karbon konsentratı və mavi konsentrat, həmçinin polimer istehsalı zamanı yaranan qeyri-standart polimerlər və polimer kompozisiya materialları istehsal ediləcək.
İnvestisiya dəyəri 11 milyon manat olan müəssisədə 100-dən çox insan daimi işlə təmin ediləcək.
İstehsal olunacaq məhsullar daxili bazarın təlabatını ödəməklə yanaşı, “Made in Azerbaijan” brendi ilə bir sıra xarici ölkələrə də ixrac olunacaq.
