Qlobal reklam bazarını kəskin tənəzzül gözləyir – PROQNOZ

Qlobal reklam bazarı cari ilin sonunadək koronavirus pandemiyasının təsirindən əziyyət çəkəcək, lakin artıq gələn il sözügedən sahənin bərpa olunacağı gözlənilir.

Bu barədə “IPG Mediabrands” şirkətinin bölməsi olan “Magna Global”ın araşdırmasında deyilir.

Araşdırmada qeyd olunur ki, bu il qlobal reklam gəlirləri 7% azalacaq – 582 mlrd. ABŞ dollarından 540 mlrd. dollaradək. Küçə, televiziya, radio, çap reklamlarından, həmçinin kinoteatrlarda reklamdan əldə olunan gəlir 16% azalaraq 238 mlrd. dollar təşkil edəcəyi gözlənilir.

Rəqəmsal reklamdan (axtarış, video, sosial şəbəkələr, bannerlər) mütəxəssislər daha yaxşı dinamika gözləyir – 1% artımla 302 mlrd. dollara qədər. Bu, əsasən, pandemiya səbəbindən istifadəçilərin daha çox vaxtını onlayn keçirməsi və smartfonlardan daha aktiv istifadə etmələri ilə əlaqədardır.

“Magna”nın mütəxəssisləri hesab edir ki, SMM və onlayn reklam sahələri 8% artacaq. Axtarış ən böyük rəqəmsal reklam formatı olaraq qalacaq (142 mlrd. dollar), lakin qlobal satışlarda durğunluq olacaq (-1%). Sosial mediada reklam gəlirləri əvvəlki illərlə müqayisədə az olacaq, banner reklamlarının gəlirləri isə 11% azalacaq.

İdman verilişlərinin olmaması və ümumiyyətlə tələbatın az olması səbəbindən TV-də reklamdan əldə olunan gəlirlər 12% azalacaq. Mütəxəssislər çap sənayesində reklam gəlirlərinin azalmasını 32%, radioda isə reklam satışlarının 15% azalacağını gözləyir.

Ən böyük azalma isə kinoteatrlarda reklam gəlirlərində proqnozlaşdırılır – 40%.

Ekspertlər hesab edir ki, 2021-ci ildə böyük idman tədbirləri hesabına reklam gəlirləri 6,1% artacaq. Buna baxmayaraq, bərpa uzunmüddətli perspektivdə reklam sənayesinə mənfi təsir göstərəcək.