Neft Fondu yeni daşınmaz əmlak investisiyalarını araşdırır
“Azərbaycan Respublikası Dövlət Neft Fondunun (ARDNF) səhmlər üzrə investisiya strategiyasının əsasını dünyanın inkişaf etmiş ölkələrinin ən iri qlobal şirkətlərinin səhmlərini özündə əks etdirən MSCI World, MSCI EUROPE ex UK və S&P kimi indekslərə passiv yatırımlar təşkil edir”.
"BI" xəbər verir ki, bu barədə ARDNF-dən məlumat verilib.
Fonddan bildirilib ki, bu çərçivədə yatırımlar hansısa spesifik meyarlara görə seçilmiş xüsusi səhm və ya səhmlərə deyil, indeksə daxil olan hər bir səhmə onların indeksdəki çəkilərinə uyğun olaraq proporsional qaydadada həyata keçirilir.
“Qeyd etmək istərdik ki, bu indekslər 23 inkişaf etmiş ölkədə 14 xarici valyutada ifadə olunmuş 1600-dən çox böyük və orta şirkətlərin səhmlərini əhatə edir”, - deyə məlumatda vurğulanıb.
İnvestisiya portfelinin diversifikasiyasına gəlincə, ARDNF-dən qeyd edilib ki, portfelin diversifikasiyasına xüsusi diqqət yetirilir: “Məlum olduğu kimi, hər bir investisiya müxtəlif səpkili risklərlə xarakterizə olunur. Bu risklərin minumuma endirilməsi məqsədi ilə portfelin diversifikasiyasına xüsusi diqqət yetirilir. Ümumiyyətlə qeyd etmək lazımdır ki, ARDNF-nin investisiya strategiyasının əsas məqsədi risklərin minimum yol verilə bilinən həddində gəlirliliyin artırılmasına yönəlmiş investisiya portfelinin qurulmasıdır. Hesab edirik ki, hal-hazırda mövcud şərtlər daxilində ARDNF kifayət qədər diversifikasiya olunmuş investisiya portfelinin qurulmasına nail olub. Belə ki, 2012-ci ildən etibarən investisiya portfelinə səhmlər (özəl səhmlər daxil olmaqla), daşınmaz əmlak, qızıl kimi maliyyə alətləri əlavə edilmiş və hazırki investisiya siyasətinə əsasən onların çəkisi ümumilikdə portfelin 40%-ə qədərini təşkil edə bilər. Hal-hazırda əsas məqsəd məhz ARDNF-nin vəsaitlərinin hazırki maliyyə bölgüsü çərçivəsində yeni investisiya təkliflərinin dəyərləndirilməsi və potensial investisiya istiqamətlərinin müəyyən edilməsidir”.
ARDNF-dən bildirilib ki, daim perspektivli, şəffaf bazar mühitinə malik olan, investisiyalar üçün cəlbedici və risklər nəzərə alınmaqla münasib gəlirlilik vəd edən Şimali Amerika, Avropa, Asiya və Sakit Okean Hövzəsi regionu bazarlarında daşınmaz əmlak investisiyalarını araşdırır. Fonddan əlavə ediblər ki, gələcəkdə də investisiya baxımından cəlbedici olan daşınmaz əmlak aktivlərinə yatırım ediləcək.
