Istiqraz yerləşdirilməsində rekord göstəricilər
1 avqust 2019-cu il tarixində “Bakı Fond Birjası” QSC-nin (BFB) tiracət platformasında Qara Dəniz Ticarət və İnkişaf Bankının AZ2001021487 qeydiyyat nömrəli istiqrazlarının yerləşdirilməsi üzrə hərracda rekord göstəricilər əldə edilmişdir.
Qara Dəniz Ticarət və İnkişaf Bankının 10 milyon manat məbləğində kütləvi təklif üsulu ilə ticarətə buraxılmış istiqrazları üzrə 81 milyon manat məbləğində sifariş toplanmışdır. Beləliklə, rəqabətli hərrac üsulu ilə yerləşdirilmiş istiqrazlara tələb təklifi 8 dəfə üstələmişdir.
Yerli qiymətli kağızlar bazarında ilk dəfə beynəlxalq maliyyə institutun milli valyutada emissiya etdiyi istiqrazlara investorlar tərəfindən rekord 63 sifariş təqdim olunmuşdur.
"Azərbaycan Respublikasının Maliyyə Bazarlarına Nəzarət Palatasının təşəbbüsü ilə beynəlxalq maliyyə institutlarının istiqraz emissiyası üzrə beynəlxalq təcrübəyə uyğun stimullaşdırıcı hüquqi çərçivənin yaradılması, o cümlədən BFB-nin listinq qaydalarında beynəlxalq maliyyə institutlarının spesifikasiyasına uyğun listinq tələblərinin müəyyən edilməsi nəticəsində həmin təşkilatların istiqraz emissiyasına dair tələblər sadələşdirilmişdir. Bu istiqamətdə atılan addımlar nəticəsində nüfuzlu beynəlxalq maliyyə institutlarından biri hesab edilən Qara Dəniz Ticarət və İnkişaf Bankı Azərbaycan qiymətli kağızlar bazarında ilk istiqrazlarını müvəffəqiyyətlə yerləşdirmişdir",- Bakı Fond Birjasından bildirilib.
Emitentin qərarına əsasən istiqrazların kəsmə qiyməti 1036.9251 AZN (7.25%), orta ölçülmüş qiyməti isə 1038.5984 AZN (7.16%) müəyyən olunmuşdur.
Hərrac nəticəsində istiqrazlar tam şəkildə yerləşdirilmişdir. Yerləşdirmənin anderrayteri “Paşa Kapital” İnvestisiya Şirkəti QSC olub.
Tədavül müddəti iki il (730 gün) olan istiqrazlar üzrə ödəmə tarixi 31 iyul 2021-ci ildir. Emissiya Prospektinə görə, illik faiz dərəcəsi 9.25% təşkil edir və faizlər üç təqvim ayından bir ödənilir. Tələb təklifdən yüksək olduğundan faiz Emissiya Prospektində elan olunmuş səviyyədən aşağı düşüb.
Qara Dəniz Ticarət və İnkişaf Bankı Azərbaycan da daxil olmaqla, 11 üzvü olan ölkələr tərəfindən yaradılmış beynəlxalq maliyyə qurumudur. QDTİB qərargahı Yunanıstanın Saloniki şəhərində yerləşir. QDTİB-ın əsas fəaliyyət istiqaməti Qara dəniz regionu ölkələrində regional əməkdaşlığın gücləndirilməsi və iqtisadi inkişafına töhfə verməsinə yönəlib. Bankın nizamnamə kapitalı 3.45 milyard avro təşkil edir. QDTİB "Standard and Poor's" agentliyi tərəfindən uzunmüddətli "A-" reytinqinə və "Moody's" agentliyi tərəfindən "A2" reytinqinə layiq görülüb.
Azərbaycanda beynəlxalq qurum ilk dəfə manatda istiqraz buraxıb. Qara Dəniz Ticarət və İnkişaf Bankı (QDTİB) hər birinin nominal dəyəri 1000 manat olan 10 000 ədəd istiqraz emissiya edib. Sözügedən emissiya beynəlxalq maliyyə institutu tərəfindən Azərbaycanda həyata keçirilən milli valyutada ilk istiqraz buraxılışı kimi tarixə düşüb.
