Tramp ölkənin kriptovalyuta ehtiyatının yaradılacağını elan edib
ABŞ Prezidenti Donald Tramp ölkənin kriptovalyuta ehtiyatının yaradılacağını elan edib. Bu ehtiyata “Bitcoin”, “Ethereum”, “Solana” (SOL), “Ripple” şirkətinin XRP-si, “Cardano” (ADA) və digər “qiymətli” rəqəmsal aktivlər daxil olacaq.
Bu barədə o, “Truth Social” sosial şəbəkəsində yazıb.
“ABŞ-nin kriptoehtiyatı bu kritik sənayeni Bayden administrasiyasının illərlə davam edən korrupsion hücumlarından sonra yüksəldəcək. Buna görə də rəqəmsal aktivlər barədə fərmanım prezidentin işçi qrupuna XRP, SOL və ADA-nı ehtiva edən kriptostrategiya ehtiyatı üzrə irəliləməyi tapşırıb. Mən ABŞ-nin dünyanın kriptopaytaxtı olmasını təmin edəcəyəm”, – Tramp vurğulayıb.
O, növbəti paylaşımında əlavə edib ki, Amerika kriptoehtiyatına “Bitcoin”, “Ethereum” və digər “qiymətli” valyutalar da daxil olacaq.
ABŞ liderinin sadaladığı kriptovalyutalar kəskin bahalaşıb. ADA 60 %, XRP 33 %, SOL 25 % artıb. “Ethereum” və “Bitcoin” isə müvafiq olaraq 13 % və 10 % dəyər qazanıb.
