SOCAR-la “Petronas”ın mövcud tərəfdaşlıq məsələləri müzakirə olunub
SOCAR ilə “Petronas” şirkətinin mövcud tərəfdaşlıq məsələləri müzakirə edilib.
SOCAR-dan bildirilib ki, aprelin 29-da şirkətin prezidenti Rövnəq Abdullayev Formula 1 SOCAR Azərbaycan Qran-Prisi ilə əlaqədar ölkəmizdə səfərdə olan Malayziyanın “Petronas” şirkətinin prezidenti Tan Sri Van Zulkifli Van Ariffinin başçılıq etdiyi nümayəndə heyəti ilə görüşüb.
R.Abdullayev qonaqları “Mercedes-AMG Petronas Motorsport” komandasının Formula 1 SOCAR Azərbaycan Qran-Prisində uğur qazanması münasibətilə təbrik edib. “Petronas” şirkətinin rəhbərliyi Formula 1 SOCAR Azərbaycan Qran-Prisinin hər il yüksək səviyyədə keçirildiyini qeyd edərək minnətdarlığını bildirib.
Görüşdə SOCAR və “Petronas” arasında mövcud tərəfdaşlıq məsələləri müzakirə olunub, o cümlədən “Şahdəniz” layihəsinin yüksək səviyyədə inkişaf etdirilməsi ilə bağlı qonaqlara məlumat verilib. Bildirilib ki, “Şahdəniz” yatağının işlənməsinin ikinci mərhələsi və Cənub Qaz Dəhlizinin digər seqmentləri üzrə işlər tam sürətlə, bəzən hətta qrafiki qabaqlamaqla yerinə yetirilir.
Şirkətlər arasında hasilat, satış və digər sahələrdə əməkdaşlıq perspektivlərinin müzakirə edildiyi görüşdə qeyd olunub ki, maraq doğuran müxtəlif sahələrdə tərəfdaşlıq imkanlarının dəqiqləşdirilməsi aparılacaq.
“Petronas”ın prezidenti bu cür yüksək səviyyəli görüşlərin faydalı olduğunu bildirib, gələcəkdə Bakıda və Malayziyada növbəti görüşlərin keçirilməsi ilə bağlı fikirlərini bölüşüb.
Xatırladaq ki, “Petronas” şirkəti “Şahdəniz” yatağının işlənməsi layihəsində 15,5 faiz, Cənubi Qafqaz Boru Kəməri layihəsində 15,5 faiz, həmçinin “Azerbaijan Gas Supply Company” şirkətində 12,4 faizlik paya sahibdir.
