Büdcənin icrasına dair operativ məlumat - 404 MİLYON MANAT ARTIQLIQ

2019-cu ilin birinci rübündə dövlət büdcəsinin mədaxili 5 milyard 439,7 milyon, xərcləri 5 milyard 35,9 milyon manat olmuş, 403,8 milyon  manat məbləğində dövlət büdcəsinin artıqlığı (profisit) yaranmışdır.

Bu barədə "BI"yə Maliyyə Nazirliyindən bildirilib.

Gəlirlər
2019-cu ilin birinci rübündə dövlət büdcəsinin mədaxili 5 milyard 439,7 milyon manat və ya 99,1 faiz icra olunmuşdur ki, bu da 2018-ci ilin eyni dövrü ilə müqayisədə 876,3 milyon manat və ya 19,2 faiz çoxdur. 
Azərbaycan Respublikasının Vergilər Nazirliyi tərəfindən dövlət büdcəsinə 1 milyard 672,9  milyon manat vəsait daxil olmuşdur ki, bu da 2018-ci ilin eyni dövrü ilə müqayisədə 236,4 mln. manat və ya 16,5 faiz çoxdur. 
Həmin vəsaitin 69,1 faizi və yaxud 1155,4 mln. manatı qeyri-neft sektorundan daxilolmaların payına düşür.
2019-cu ilin birinci rübündə Azərbaycan Respublikasının Dövlət Gömrük Komitəsi tərəfindən dövlət büdcəsinə 1014,1 mln. manat vəsait təmin edilmişdir ki, bu da ötən ilin eyni dövrü ilə müqayisədə 39,5 faiz və yaxud 287,1 mln. manat çoxdur.
Dövlət büdcəsindən maliyyələşdirilən təşkilatların ödənişli xidmətlərindən daxilolmaları 93,8 mln. manat təşkil etmişdir. 
Sair daxilolmalar üzrə büdcəyə 43,9 mln. manat vəsait daxil olmuşdur ki, bu da ötən ilin eyni dövrü ilə müqayisədə 2,0 dəfə və yaxud 22,3 mln. manat çoxdur.
Azərbaycan Respublikasının Dövlət Neft Fondundan dövlət büdcəsinə 2615,0 mln. manat vəsait transfert edilmişdir.

Xərclər
2019-cu ilin birnici rübündə dövlət büdcəsinin xərcləri proqnoza nisbətən 100,4 faiz və yaxud 5035,9 mln. manat icra edilmişdir ki, bu da ötən ilin eyni dövrünə nisbətən 627,9 mln. manat və ya 14,2 faiz çoxdur.
İqtisadi təsnifata uyğun olaraq cari ilin ilk üç ayında dövlət büdcəsi xərclərinin 41,8 faizi və ya 2104,5 mln. manatı sosialyönümlü xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilmişdir ki, bu da ötən ilin eyni dövrü ilə müqayisədə 19,5 faiz və ya 343,2 mln. manat çoxdur. 

2019-cu ilin birinci rübündə dövlət büdcəsi xərclərinin 2707,3 mln. manatı və ya 53,8 faizi cari xərclərə, 1984,4 mln. manatı və ya 39,4 faizi əsaslı xərclərə, 344,2 mln. manatı və ya 6,8 faizi dövlət borcuna və öhdəliklərinə xidmətlə bağlı xərclərə yönəldilmişdir. 

Dövlət əsaslı vəsait qoyuluşu xərclərindən cari ilin birinci rübündə 927,7 mln. manat istifadə edilməklə elm, təhsil, səhiyyə, sosial, mədəniyyət, idman və digər sosial-mədəni və məişət təyinatlı obyektlərin tikintisinə və yenidən qurulmasına 210,0 mln. manat, enerji, su və qaz təchizatı, nəqliyyat, kommunal, meliorasiya infrastrukturlarının tikintisinə, yenidənqurulmasına və digər investisiya layihələrinə 717,7 mln. manat vəsait yönəldilmişdir.

2019-cu ilin ilk üç ayında büdcə təşkilatlarının təqdim etdikləri xərc sifarişləri üzrə xəzinədarlıq orqanları tərəfindən qəbul edilmiş öhdəliklər tam və vaxtında maliyyələşdirilmişdir.

İcmal büdcə
Cari ilin birinci rübündə icmal büdcənin gəlirləri 9192,2 mln. manat olmuşdur ki, bu da ötən ilin eyni dövrü ilə müqayisədə 2129,2 mln. manat və ya 30,1 faiz çoxdur. İcmal büdcənin xərcləri isə 5076,9 mln. manat icra olunmuşdur ki, bu da ötən ilin eyni dövrü ilə müqayisədə 319,0 mln. manat və ya 6,7 faiz azdır. 
İcmal büdcədə 4115,3 mln. manat artıqlıq (profisit) yaranmışdır.