Səyahətin yeni trendi: insanlar artıq tətilə sadəcə dincəlmək üçün getmir
Yeni nəsil turistlərin seçimi dəyişir: onlar səfərdən suvenir əvəzinə yeni bacarıq və hobbi ilə qayıtmaq istəyirlər. “Skillcation” adlanan bu trend 2026-cı ildə turizmdə sürətlə yayılır.
Ənənəvi tətil anlayışında əsas məqsəd istirahət etmək, yeni yerlər görmək və gündəlik həyatın tempindən uzaqlaşmaqdır. Lakin səyahətçilərin seçimləri dəyişir. İndi turistlər səfərdən yalnız fotoşəkillərlə deyil, öyrəndikləri yeni bacarıqlarla qayıtmaq istəyirlər.
Bu yeni yanaşma artıq “skillcation” – yəni bacarıq öyrənməyə həsr olunmuş tətil adlandırılır.
Turistlərin 68%-i deyir: bu tətil həyatımı dəyişə bilər
IHG Hotels & Resorts və Talker Research tərəfindən 1 000 amerikalı arasında aparılan sorğuya görə, respondentlərin 47%-i skillcation formatında səyahət etməkdə maraqlıdır.
Daha maraqlısı isə odur ki, 68% belə bir təcrübənin həyatını dəyişə biləcəyini düşünür. Bu tendensiyanın əsas hərəkətverici qüvvəsi gənclərdir. Z nəsli və millennialların 41%-i artıq ən azı bir dəfə bacarıq öyrənməyə yönəlmiş səyahətə çıxıb. Baby Boomer nəslində isə bu göstərici cəmi 16%-dir. Başqa sözlə, gənc turist üçün otelin hovuzu və dənizə yaxınlığı qədər “bu səfərdə nə öyrənəcəyəm?” sualı da əhəmiyyət qazanmağa başlayır.
Tətil zamanı telefondan da uzaqlaşmaq istəyirlər
Skillcation trendinin daha bir maraqlı tərəfi onun rəqəmsal detoksla birləşməsidir. Sorğuda iştirak edənlərin 68%-i belə bir səfər zamanı rəqəmsal dünyadan tamamilə uzaqlaşmağa hazır olduğunu bildirib. Z nəslində bu göstərici daha da yüksək – 83% təşkil edir. Bu, müasir turizmdə maraqlı paradoks yaradır: texnologiyanın köməyi ilə səyahəti planlaşdıran insanlar tətil zamanı məhz həmin texnologiyadan uzaqlaşmaq istəyirlər.
Ən populyar seçim – yemək bişirmək
Bəs turistlər səyahət zamanı hansı bacarıqları öyrənmək istəyirlər? Sorğuya görə, kulinar bacarıqlar birinci yerdədir. Respondentlərin 37%-i səyahətini məhz yemək bişirməyi öyrənmək üzərində qurmaq istədiyini bildirib. Bu səbəbdən müxtəlif otellərin proqramlarında kulinariya dərsləri getdikcə daha çox yer tutur.
Məsələn, ABŞ-ın Kaliforniya ştatındakı Kimpton Shorebreak Hotel-də qonaqlar müxtəlif içliklər hazırlamağı, xəmir yaymağı və piroqun kənarlarını peşəkar formada hazırlamağı öyrənirlər.
İsveçrədəki Six Senses Crans-Montana otelində isə turistlər ənənəvi Alp pendiri hazırlamağı öyrənə bilirlər. Karib dənizində yerləşən Sent-Lüsiyadakı Jade Mountain Resort-da qonaqlar vegan kreol mətbəxi üzrə dərslərdə iştirak edir və yerli bitkilər və Karib mətbəxi ilə tanış olurlar.
Təkcə yemək deyil: ukulele, quş müşahidəsi və hətta hovuzda mahjong
Skillcation anlayışı kulinariya ilə məhdudlaşmır. Məsələn, Sakit okeandakı Saipan adasında Crowne Plaza Resort qonaqlara ukulele çalmağı və yerli ada mahnılarını öyrədir. Dominikada turistlər quş müşahidəsi proqramlarında iştirak edə və yalnız bu ərazidə rast gəlinən Jaco və Sisserou tutuquşularını müşahidə edə bilərlər.
ABŞ-ın Arizona ştatında isə Kimpton Miralina Resort & Villas daha qeyri-adi seçim təklif edir: hovuz kənarında mahjong dərsləri.
Səyahət artıq sadəcə “hara getdim?” sualı deyil
Sorğunun nəticələri göstərir ki, insanların səyahətdən gözləntiləri dəyişir. Respondentlərin 27%-i belə təcrübələrdən sonra yeni imkanlara daha açıq olduqlarını, eyni nisbətdə insan özünəinamının artdığını, 26%-i isə səyahətlərin onlar üçün daha mənalı olduğunu bildirib.
Beləliklə, turizmdə yeni tendensiya formalaşır: insanlar artıq tətilə yalnız istirahət etməyə yox, özlərinə yeni bir şey əlavə etməyə gedirlər.
Bu baxımdan skillcation, sadəcə yeni turizm məhsulu deyil. O, turistin səyahətə münasibətinin dəyişdiyini göstərir: ən yaxşı suvenir artıq soyuducunun üzərindəki maqnit deyil, evə qayıtdıqdan sonra istifadə edə biləcəyin yeni bacarıqdır.
