Trampdan yeni təhdid: "Hörmüz boğazı açılmasa, İrana çox sərt zərbələr endirəcəyik"
ABŞ prezidenti Donald Tramp çərşənbə axşamı İranla danışıqları müsbət adlandıraraq, "bütün gün danışıqların" aparıldığını bildirib; lakin o, həmçinin razılaşma əldə edilməsə, İranı "çox sərt" zərbələrlə hədələyib.
Prezident Tramp Fox News-a İranla davam edən danışıqlar barədə danışıb.
Tramp açıqlamasında deyib: "İranla çox yaxşı danışıqlar aparırıq. Hörmüz boğazı çox tezliklə açılacaq. Əgər açılmasa, İrana çox sərt zərbə vuracağıq".
ABŞ dövlət katibi Marko Rubio da dünən Hörmüz boğazı ilə bağlı bildirib: "Deyə bilərəm ki, İranla bu prosesdə irəliləyiş olub, amma hələlik yekunlaşdırılmayıb, ümid edirəm ki, tezliklə olacaq".
İran: Danışıqlarda irəliləyiş əldə edilib
Bu arada, İran Xarici İşlər Nazirliyinin sözçüsü İsmayıl Bekayi Hörmüz boğazında gəmilər üçün təhlükəsiz keçid yollarının yaradılması məqsədi ilə Omanla aparılan texniki və siyasi danışıqlarda irəliləyiş əldə edildiyini açıqlayıb.
İranın rəsmi xəbər agentliyi IRNA-nın məlumatına görə, Xarici İşlər Nazirliyinin sözçüsü Bekayi Hörmüz boğazı ilə bağlı Omanla aparılan danışıqlar barədə məlumat verib.
Bekayi danışıqların Hörmüz boğazı ilə həmsərhəd olan iki ölkə arasında gəmilər üçün təhlükəsiz keçid yollarının müəyyənləşdirilməsinə yönəlmiş dialoq kimi aparıldığını bildirib və əlavə edib ki, bu proses İranın suveren hüquqlarını qoruyur və eyni zamanda həm İran, həm də Omanın milli təhlükəsizlik narahatlıqlarını da nəzərə alır.
Bekayi danışıqların indiyə qədər həm texniki, həm də siyasi səviyyələrdə müsbət irəlilədiyini qeyd edərək deyib: "İran, Omanla əməkdaşlıq edərək, bu strateji su yolunda gəmi hərəkətinin idarə olunması ilə bağlı gələcək tənzimləmələr üçün lazımi mexanizmlər hazırlamaq üzərində işləyir. Danışıqların yekun nəticələri daha sonra açıqlanacaq".
