Dünyada ərzaq qiymətləri yenidən bahalaşmağa başladı
Birləşmiş Millətlər Təşkilatının Food and Agriculture Organization (FAO) tərəfindən açıqlanan məlumatlara görə, qlobal ərzaq qiymətləri indeksi beş aylıq enişdən sonra fevral ayında yenidən artıb.
FAO-nun Ərzaq Qiymətləri İndeksi fevral ayında aylıq müqayisədə 0,9% artaraq 125,3 bənd təşkil edib. Bununla belə, indeks illik müqayisədə 1% azalma göstərib.
Qiymət artımının əsas səbəbi taxıl, ət və bitki yağları qruplarında bahalaşmanın qeydə alınması olub.
Taxıl qiymətləri yüksəldi
FAO-nun taxıl qiymətləri indeksi fevralda aylıq 1,1% artıb, lakin illik müqayisədə 3,5% azalıb. Dünya bazarında buğda qiymətləri 1,8% yüksəlib. Buna Avropa və ABŞ-ın bəzi bölgələrində şaxtalar səbəbindən məhsul itkiləri ilə bağlı risklərin artması, həmçinin Rusiyada logistika problemləri və Qara dəniz regionundakı gərginlik təsir edib.
Bitki yağları son illərin zirvəsinə yaxınlaşdı
Bitki yağları qiymət indeksi fevralda aylıq 3,3% artaraq 2022-ci ilin iyunundan bəri ən yüksək səviyyəyə çatıb. İllik müqayisədə isə bu göstərici 11,7% artıb. Artım əsasən palma, soya və kolza yağlarının bahalaşması ilə əlaqədardır.
Ət bahalaşır, süd məhsulları ucuzlaşır
Fevral ayında ət qiymətləri indeksi aylıq 0,8%, illik isə 8% artıb. Xüsusilə mal və qoyun ətinin qiymətlərində artım müşahidə olunub.
Buna qarşılıq, süd məhsulları qiymətləri aylıq 1,2%, illik isə 19,2% azalıb. Bu azalma əsasən Avropa İttifaqında pendir qiymətlərinin ucuzlaşması ilə bağlıdır.
Şəkər qiymətləri isə düşür
Şəkər qiymətləri fevral ayında aylıq 4,1%, illik müqayisədə isə 27,3% azalıb. Bunun səbəbi qlobal bazarda yüksək istehsal və bol təklif gözləntiləridir.
Ümumilikdə, qlobal ərzaq bazarında bir sıra məhsullar üzrə qiymətlər artsa da, bəzi kateqoriyalarda ucuzlaşma davam edir. Analitiklərə görə, iqlim riskləri, logistika problemləri və qlobal tələbin artması yaxın aylarda ərzaq qiymətlərində dəyişkənliyi davam etdirə bilər.
