2027-yə qədər 10 stansiya? - Yeraltı optimizm, yerüstü reallıq
Bu yaxınlarda rəsmən səsləndi ki, 2027-ci ilə qədər Bakıda 10 yeni metro stansiyası tikilməlidir. Reallıqda isə bu 10 stansiyadan yalnız birində tikinti gedir, qalan 9-u hələ layihə mərhələsindədir.
Bir az riyazi hesablama aparaq, elə də çətin deyil: Metro stansiyası layihə mərhələsindədirsə, onun tikintisi ən yaxşı halda 3-5 il, reallıqda isə 7–8 il çəkir. Bu da o halda ki, indiki vəziyyətdən fərqli olaraq pul problemi ümumiyyətlə yoxdur.
Gələk xərclərə! Metro tikintisi dünyada minimum 100 milyon dollar/km başa gəlir.
10 stansiya × təxminən 3 km × 100 milyon = 3 milyard
Stansiyaların özü: 10 × 50 milyon = 500 milyon
Cəmi: 3,5 milyard dollar
İndi əsas sual: Dövlətin investisiya büdcəsində belə pul varmı? – Yox, çünki əsas vəsait Qarabağın bərpasına yönəlib.
Bəs borc götürsə? Borc gəlir gətirən layihələr üçün alınmalıdır.
Metro isə…
– gəlir gətirmir,
– dotasiya ilə yaşayır,
– yumşaq desək, maliyyə baxımından “çətin vəziyyətdədir”.
Yəni 2027-yə qədər 10 stansiya?!
Kağız üzərində – mümkündür.
Yer altında – çox çətin.
Reallıqda isə… demək olar ki, mümkün deyil.
Amma plan gözəldir. Şəkildə yaxşı görünür.
Metronun özü kimi: xəritədə var, həyatda gecikir!
