Rusiya Prokurorluğu: Məmmədəli Ağayev 20 milyon rubl mənimsəyib
Moskva Akademik Satira Teatrının keçmiş direktoru Məmmədəli Ağayevə xüsusilə külli məbləğdə dələduzluqla bağlı ittiham irəli sürülüb.
TASS yazır ki, bu barədə Moskva prokurorluğu məlumat yayıb.
Prokurorluq iddia edir ki, M.Ağayev guya icra edilmiş işlərə dair saxta hesabatlar əsasında digər iştirakçılarla birlikdə təxminən 20 milyon rubl mənimsəyib.
Məlumata görə, mədəniyyət xadimi xüsusilə külli miqdarda dələduzluqda şübhəli bilinir. Müstəntiqlərin fikrincə, Ağayev Moskva büdcəsinin vəsaitlərini mənimsəmək üçün sxem təşkil edib. Fərdi sahibkarları qeydiyyata alıb, teatrla saxta müqavilələr bağlayıb.
Onun barəsində həbs-qətimkan tədbirinin seçilməsi üçün yaxın vaxtlarda məhkəmə qarşısına çıxarılacaq.
Xatırladaq ki, Məmmədəli Ağayev 1992-2021-ci illərdə Moskva Akademik Satira Teatrına rəhbərlik edib. 2021-ci ildə öz xahişi ilə bu vəzifəni tərk edib.
Onun mədəniyyət və incəsənət sahəsində bir neçə mükafatı və titulları var.
Məmmədəli Ağayev Rusiya Federasiyasının əməkdar mədəniyyət işçisi (1995), Rusiya Federasiyasının Əməkdar artistidir (2018). 2020-ci ilin mart ayında Rusiya Prezidentinin Fəxri Fərmanı ilə təltif edilib.
