Azərbaycan banklarında vaxtı keçmiş borclar artıb. İstehlak kreditlərində hansı əmsal artıb?

Bu il martın 1-nə Azərbaycanda vaxtı keçmiş kreditlərin məbləği 480,1 milyon manat təşkil edib.

Azərbaycan Mərkəzi Bankının açıqladığı hesabata görə, bu, fevralın 1-i ilə müqayisədə 1,05 % çoxdur.

Ölkədə problemli kreditlərin məbləği ilin əvvəlinə nisbətən 6,9 %, son 1 ildə isə 2,3 % artıb. Ötən il martın 1-nə 471 milyon manat təşkil etdiyi halda, bu il martın 1-nə 480 milyon manat olub. Manatla olan kreditlərdə vaxtı keçmiş borcların həcmi artıb, xarici valyutada olan kreditlərdə isə ümumi tendensiya azalmanı göstərir.  

Cəmi kredit portfelinin həcmi isə 27 milyard 592.4 milyon manat təşkil edir. 

Fevralın sonuna vaxtı keçmiş kreditlərin ümumi kredit portfelində xüsusi çəkisi 1,6 % təşkil edib. Bu nisbət yanvarın sonuna da 1,6 %, dekabrın sonuna 1,5 %, ötən il fevralın sonuna isə 1,9 % olub.

Qeyri-işlək kreditlərin portfeldəki həcmi 2.4%-dən 2,5%-ə qalxıb. Bu kreditlərin artmasında istehlak kreditlərinin artımı diqqəti çəkir. Belə ki, ötən iki ayda biznes kreditlərində qeyri-işlək kreditlərin həcmi 2,5%-dən 2,6%-ə yüksəldiyi halda, istehlak kreditlərində 2,9%-dən 3,3%-ə yüksəlib. İpoteka kreditlərində isə bu əmsal dəyişməyərək 0,8% həmində qalıb.