"Azərbaycandakı kimi yaşayacaqlarsa, bura gəlməsinlər" - AZƏRBAYCANLI BİZNESMEN

"Amerikaya 24 yaşında gəlmişəm. Təzə gələndə Vaşinqton hava limanında təsadüfən bir yaşlı amerikalı ilə eyni skamyada oturmuşduq. Yeni gəldiyimi bilib bır neçə məsləhət verdi. Onlardan biri bu idi: - Amerika elə bil insanla dolu bir otaqdır. Burada hamı dayanmadan yumruq atır. Gərək sən də o otağa girəndən çıxanadək yumruq atasan ki, zərbələrdən yıxılmayasan. Bır də addım-addmı getməyə çalış. Sonda görəcəksən ki, artıq yüyürürsən. Nə edirsən elə. ancaq təslim olma".

"Businessinsider.az" xəbər verir ki, ABŞ-da Azərbaycanlı iş adamı Pənah İbrahimov 1985-ci ildə Şuşa şəhərində dünyaya gəlib. 2002-ci ildə orta təhsilini Bakıda başa vurub. Həmin il Azərbaycan Dövlət İqtisadiyyat Universitetinə qəbul olunub. 2006-cı ildə orada iqtisadçı ixtisasına yiyələnib. Üç il müxtəlif maliyyə qurumunda, sığorta şirkətlərində çalışıb. 2009-cu ildə ABŞ-a, Vaşinqtona gəlib. 2009-2011-ci illərdə Strayer Universitetində biznesin idarə edilməsi üzrə təhsil alaraq magistr dərəcəsinə yüksəlib. (MBA). Böyüdüyü ailə imkanlı deyil - atası Sadiq İbrahimov Şuşa Musiqi Kollecində müəllim işləyir.

• Eləcə də bax: Azərbaycanlı Əbu-Dabinin ən məşhur qəhvəçisidir - FOTO

2010-cu ildə mebel və təmir tikinti işləri ilə məşğul olan iki şirkət açıb. 2013-cü ildə şirkətləri birləşdirərək "FACE" şirkətlər qrupunu yaradıb. Şirkət indiyədək Vaşinqton, Merilend və Virciniya ştatlarında neçə-neçə 32 və 54 mənzilli 6 mərtəbəli binalar, eləcə də 70-dən yuxarı fərdi evlər tikərək təhvil verib. 200-ə yaxın işçisi var.

Deyir ki, "ABŞ-a gəlmək istəyən gənclərə bir tövsiyəm var: Əgər Azərbaycandakı həyat tərzini burada da davam etdirmək niyyətindədilərsə, gəlməsinlər. İnsan yüksək bir dağ zirvəsinə qalxmamışdan əvvəl özünü necə səfərbər edirsə, gələrkən burada qarşılaşa biləcəkləri bütün çətinliklərə hazır olmalıdırlar".