“OpenAI”, “Oracle” və “SoftBank” 100 milyard ilkin investisiya ilə “Stargate” şirkətini yaradırlar
ABŞ prezidenti Donald Tramp Ağ Evdə çıxışı zamanı süni intellektin inkişafına 500 milyard dollar sərmayə qoyacaq “Stargate” şirkətinin yaradıldığını elan edib. Bildirilir ki, “Stargate” şirkəti “OpenAI”, “SoftBank” və “Oracle” arasında birgə müəssisə olacaq.
Donald Tramp “OpenAI”, “SoftBank” və “Oracle” şirkətlərinin liderləri ilə görüşüb. “SoftBank”ın baş direktoru Masayosi Son süni intellektin inkişafına 100 milyard dollarlıq “təcili sərmayə” yatıracağını açıqlayıb.
Cənab Trampın süni intellektin xəstəliklərlə mübarizədə necə kömək edə biləcəyi sualına “OpenAI”nin baş direktoru Sem Altman deyib: “İnanıram ki, bu texnologiya inkişaf etdikcə xəstəliklərin görünməmiş sürətlə sağaldığını görəcəyik”.
Ağ Evdə çıxış edən cənab Tramp qeyd edib ki, “Stargate” layihəsi “SoftBank”ın süni intellektə 100-200 milyard dollar sərmayə yatırmaq vədinə əlavədir. Bir gün əvvəl “CBS News” öz mənbələrinə istinadən xəbər verib ki, “Stargate” çərçivəsində ilkin olaraq süni intellektə 100 milyard dollar sərmayə qoyulacaq, 500 milyard dollar isə növbəti dörd il üçün ümumi investisiya olacaq.
