Həmin qadağa bu gecədən qüvvəyə minir - Sürücülərin nəzərinə!
Bu gecə saat 00:00-dan etibarən Bakı şəhərinin bir sıra küçə və prospektlərində təşkil edilən COP29 zolaqlarına avtomobillərin daxil olması qadağan ediləcək.
ENA.az xəbər verir ki, COP29 zolaqlarına daxil olanlar inzibati məsuliyyətə cəlb ediləcəklər və 100 manat+3 bal dəyərində cərimələnəcəklər.
Artıq həmin zolaqlara avtobus zolağı statusunu verən 5.9, yəni “Ümumi istifadədə olan nəqliyyat vasitələri üçün zolaq” yol nişanları quraşdırılıb.
Qeyd edək ki, oktyabrın 15-də Yerüstü Nəqliyyat Agentliyi 31 oktyabradək COP29 zolaqlarına avtomobillərin daxil ola biləcəyi barədə məlumat yaymışdı.
Qurum paytaxtımızda keçiriləcək beynəlxalq tədbirdən sonra bu zolaqların silinməyəcəyini və ümumi istifadədə olan nəqliyyat vasitələrinin hərəkəti üçün qalacağını bildirmişdi.
