Qlobal bazarlarda Yaponiya gündəmi
Yaponiya Bankının (BOJ) mənfi faiz rejiminə son qoymasına və gəlir əyrisinə nəzarət də daxil olmaqla bəzi digər tədbirləri aradan qaldırmasına baxmayaraq, dövlət istiqrazlarını almağa davam edəcəyini bildirməsindən sonra yapon yeni zəifləyib. Ölkənin dövlət istiqrazları dəyər qazanarkən, Topix indeksi 1990-cı ildən bəri ən yüksək səviyyəni sınaqdan keçirib.
MSCI AC Asia Pacific Index, Honq-Konq texnologiya səhmlərində və Cənubi Koreya səhmlərində yüzdə 1-dən çox itkilərə görə düşüb. Avstraliya dolları təxminən iki həftənin ən zəif səviyyəsinə doğru irəliləyərkən, Avstraliya Mərkəzi Bankı siyasət faizlərini 12 ilin ən yüksək səviyyəsində saxladıqdan sonra ölkənin fond indeksləri qazanclarını davam etdirdi.
Bazar ertəsi S&P 500 üç günlük sürüşməni qırdı, Nasdaq-100 1 faiz dəyər qazandı və Bloomberg-in Tesla, Meta, Apple və Nvidia kimi texnoloji səhmlərin daxil olduğu Möhtəşəm 7 Total Return İndeksi yüksəldi. Fyuçerslərdə ABŞ səhmləri aşağı düşüb. Bloomberg Dollar İndeksi 4 gün dalbadal yüksəlib.
BOJ 17 ildən sonra ilk dəfə faiz dərəcələrini artırıb
Yaponiya Bankı (BOJ) gəlir əyrisinə nəzarət mexanizmi ilə dünyada sonuncu mənfi faiz dərəcəsi praktikasına son qoymaqla müasir tarixin ən aqressiv monetar ekspansiya proqramına son qoydu.
Çərşənbə axşamı günü sona çatan iki günlük pul siyasəti iclasından sonra verilən açıqlamaya görə, BOJ 2007-ci ildən bəri ilk dəfə qısamüddətli faiz dərəcəsini 0,1 faiz artırdı və yeni siyasət faiz dərəcəsini yüzdə 0-0,1 aralığında təyin etdi.
Həmişəkindən daha uzun sürən iclasın sonunda faiz dərəcələrinin artırılması qərarı 2 əleyhinə 7 səslə qəbul edilib. BOJ həmçinin gəlir əyrisinə nəzarət proqramını ləğv etdi və lazım gələrsə, uzunmüddətli dövlət istiqrazlarını almağa davam edəcəyinə söz verdi. Bank birjada ticarət edilən vəsaitlərin alışını da dayandırıb.
Bu dəyişiklikləri edərkən BOJ, yüzdə 2 sabit inflyasiya hədəfinin görünməyə başladığını vurğuladı.
