Azərbaycanda sənaye zonalarına 830 milyon manat investisiya qoyulacaq
Azərbaycanda mövcud layihələr üzrə sənaye zonalarına əlavə 830 milyon manat investisiya yatırılması, 7 000-dən çox yeni iş yeri yaradılması nəzərdə tutulur.
Bunu İqtisadiyyat Nazirliyinin tabeliyindəki İqtisadi Zonaların İnkişafı Agentliyinin İdarə Heyətinin sədri Seymur Adıgözəlov bu gün keçirilən mətbuat konfransında bildirib.
O qeyd edib ki, indiyə qədər sənaye zonalarında 142 sahibkarlıq subyektinə rezidentlik statusu verilib: "Sahibkarlar sənaye zonalarına 6,6 milyard manatdan çox investisiya yatırıb, 10 000-dən artıq daimi iş yeri yaradıb".
Bundan başqa, sədrin sözlərinə görə, indiyə qədər sənaye zonalarında 12,1 milyard manatlıq məhsul istehsal edərək satıb ki, bunun 3,9 milyard manatlıq və yaxud 32,2 %-i ixrac olunub: "O cümlədən, 2023-cü ildə sənaye zonalarının rezidentləri 3,3 milyard manatlıq məhsul satıb ki, bunun da 989 milyon manatlıq hissəsi ixracın payına düşüb. 2022-ci illə müqayisədə satış 12,5 % artıb".
S.Adıgözəlov əlavə edib ki, ötən il sənaye zonalarının qeyri-neft sənayesi məhsulları istehsalında xüsusi çəkisi 18,6 %, ixracında isə 23,6 % təşkil edib: "Sənaye zonalarının məhsulları 65-dən çox ölkəyə (ABŞ, Kanada, Brazilya, Böyük Britaniya, İtaliya, Avstriya,İspaniya, BƏƏ, İsrail, Çin, Hindistan və s.) ixrac edilib.
